Dewaya Nisêbînî siba ya: Domanê Nurşane maya xo wazenê 

2018-07-07 14:06:35


	 

	MÊRDÎN - Nurşan Demîra ke dewaya Nisêbîn de bi di serre yo tepişnayîya, domanê aye wazenê maya înan roniştişê 9ê Temmuze de bêra veradayîş.

	 

	Nisêbînê Mêrdîn de 2016 de qedexeyê tebervejîyayîşê kuçeyan ame îlankerdiş û nê prosesî de Nurşan Demîre amî tepiştiş û 2 serrî yo tepişnayîya. Nurşana ke di serrî yo 5 domanê xo dûrîya bi îfadeyê şahidê nimte amî tepiştiş. Nurşana ke surgunê hepisxaneyê Wanî amî kerdiş, roniştişê dewa 9ê Temmuze de ya. Nurşane verê zî seba bireso domananê xo veng da û na rey lajê aye Şiyar seba veradayîşê maya xo veng da. 

	 

	Waya Nurşane, Cemîle Elmase dîyar kerde ke waye aye bêsebeb ameya tepiştiş û wina va: "Keyeyê xo yê taxa Firatî de mendêne. Wextê qedexeyî domananê xo vet la aye nêvejîya. Dima ra amî tepiştiş. Zaf îşkence ro ci ame kerdiş. Ewil berdî Mêrdînî û dima ra zî eşrawitî Wan.

	 

	Cemîle da zanayîş ke domanê aye tewr qij 14 serre yo û seba maya înan verê înan de nîya, zaf zehmetî ancenê û va ganî êdî her kes bibo vengê domanan.

	 

	‘Ma maya xo wazenê'

	 

	Lajê aye Şiyar 14 serre yo zî dîyar zaf berîya maya xo kerda û va wazeno maya ey bêro veradayîş û pîlbîyayîşê ma bivîno.