Sosyologî Wanî de cigêrayîş kerdî: Zafê ci mergê bi şikin î 2018-07-05 14:21:24   WAN - Sosyolog Neslîhan Şedale dîyar kerde ke her xokiştişêk cinîyan esasê xo de kiştişêk o û wina dewam kerde: “Nê hedîseyan ra zafê ci sey mergê bi şikin yenî binamekerdiş. Raporê nêweşxaneyan dano nîşandayîş ke polîsî mergê bişikinan de dest bi tewqîfkerdişan nêkenî û hedîse wina yeno girewtiş.”   Bajarê Wanî de goreyê peymeyê fermî tena aşma verên de 4 cinîyî netîceyê ‘xokiştişî’ de cuya xo vînî kerdî. Platformê Cinîyan yê Ahtamara ra Sosyolog Neslîhan Şedale arde ziwan ke her ‘xokiştişêk’ komel û sîstemî reyde eleqedar o û îdarekarî tewr vernî keyeyan reyde pêvînayîş kenî. Neslîhan Şedale daye zanayîş ke hedîseyê winasî de problemê komelkî û ekonomî vejîyenî raste.   ‘Zafê ci mergê bi şikin î’   Neslîhane destpêk qiseykerdişê xo de wina va: “Hedîseyê ‘xokiştişî’ de problemê psîkolojî, şîddet û ekonomî vejîyenî raste. Labelê peynîya heme probleman de sîstem esta. Wexto ke nê hedîseyan de cigêrayîşî yenî kerdiş, vejîyeno raste ke keyeyan ra bigêr heta perwerdeyî, ekonomî û sewbîna xeylê çîyî estî. Domanî şenikîyê xo de yenî zewicnayîş. Cok raxeylê problemî xo danî teber. Raporê nêweşxaneyan de vejîyeno raste ke polîsî mergê winasî de kesêk daxî nêtepişenî.”   Neslîhane qiseykerdişê xo wina domnaye: “Pêvînayîşan de keyeyê cinîyêk bi asanî eşkeno vajo ke ‘mergêk bi şikin o.’ Pêvînayîşan de vejîyeno raste ke nê cinîyî bi desan reyî teşebbusê xokiştişî kerdî, labelê keyeyî goş nêdayî. Ganî ma goş bidî nê qêrayîşan. Her xokiştişêk cînayetêk o.”   Neslîhane qiseykerdişê yê peyênan de bale ante problemê ekonomî ser û wina va: “Hedîseyê xokiştişî de xeylê kesî probemanê okonomî vera şîyî sewbîna bajarêk. Cinîyî herindake mêrdeyê xo reyde bicuyî, mecbur manenê ke keyeyê mêrdeyê xo reyde bicuyî. Çareserî alternatîfa koleyê cinîyan û têkoşîn a. Ganî cinîyî bibî wayîrê fehm û zanayîşî.”