Dewaya Nisêbînî 9ê Temmuze de ya: Derheqê muracatê sucî de hema çîyêk çin o 

2018-06-30 11:26:51


	 

	MÊRDÎN - Nisêbîn de wextê pêrodayîşan de 70 kes ameybî tepiştiş û tewqîfkerdiş. 3in roniştişê 53 kesî 9ê Temmuze de yeno vînayîş. Derheqê muracatê hepsîyan ke tepiştiş de rastê îşkence ameyê de zî tu çîyêk heta ewro nêameyo kerdiş.

	 

	Nisêbînê Mêrdînî de 14ê Adara 2016 de qedexeyê tebervejîyayîşê kuçeyan ame îlankerdiş û wextê ke qedexeyî dewam kerdêne de 70 kesî ameyî tahlîyekerdiş û ameyî tepiştiş. 70 kesî ra dewaya 53 kesî do 9ê Temmuze de bêro vînayîş. Dimayê di serran ra dima roniştişê yewin aşma Çele de virazyabi 9 rojan dewam kerdib. Roniştişê diyîn zî aşma Nîsane de ame vînayîş û 8 rojan dewam kerdib. Yê 3in zî do 9ê Temmuze de hetê 4in Dadgeha Cezaya Giran ya Mêrdînî ra awanîya Sazgehê Asayîşê Komelî ra (SGK) bêro vînayîş. Hepsî bi waştişê 76 rey muebetê giran do vejîyê vera dadgere.

	 

	Pawitişê hepsîyan mohrê xo da roniştişî ro

	 

	Her di roniştişan de keye û çapemenî serê israrê înan de eşkabî beşdarê roniştişî bibê, la waştişê avûkatanê ke hewteyêke ardî ziwan zî hetê dadgehe ra ame redkerdiş. Pawitişê ke hewteyêke ame kerdiş de îdianameyê ke heyetê dadgehe vet vernîya hepsîyan zî nêame qebulkerdiş. Hepsîyan îdianameyo ke bi îfadeyê dimayê îşkence ameyo amadekerdiş qebûl nêkerd û salona dadgehe de îdareyê xoserî pawitî. Her roniştiş de pawitişê hepsîyan mohrê xo da roniştiş ro. Hepsîyê ke salone de bi polîsê îşkencekaran dir mehdî, hepisxane de  rastê tehdîdan ameyî.

	 

	Dosyayê îşkenceyî rê qerarê nimte dayî

	 

	Heto bîn ra hepsîyan seba ke îşkence dîbî, avûkatan muracatê suc kerdibî, la bêsebeb qerarê nimte dayî serê nê dosyayan. Goreyê zanayîşê avûkatan ra ameyê girewtiş, derheqê dosyan de tu çîyêk nêameyo kerdiş.