'Eke çiyêk bi birayê mi bêro, berpirsîyar dewlet o' 

2018-06-28 13:47:58


	 

	Rojda Aydin

	 

	
		
			AMED - Badê qayumî tayînê şaredarîyanê Partîya Herêmê Demokratîkî (DBP) ameyî kerdiş, hevşaredar û xebatkarî ameyî tewqîfkerdiş. Nê hemşaredaran ra yewe zî Hemşaredara Pîranî Zulfîye Kişmîre ya. Zulfîye Kişmîre 10 aşmîyo ke Zindanê Tîpa Eyî ya Amedî de yena tepiştişe. 
		
			 
	


	Keyeyê Zulfîye Kişmîre dîyar kerd ke hema îdîanameyê derheqê aye qedexeyê nimitişê cigêrayîşan vera nêameyo amadekerdiş û keye waşt ke rewşa Zulfîye bêra zelalkerdiş. Babete ser o mêrdeyê Zulfîye Çetîn Kişmîr û kênaya aye Melîke Kişmîre qisey kerdî.

	 

	Derheqê Zulfîye de 6 kesî îfade dayî

	 

	Çetîn Kişmîrî qiseykerdişê xo de wina va: “Derheqê Zulfîye de 6 kesî îfade dayî. Îfadeyê ke ameyî dayîş raşt nîyî. Îdîaname ser o qerarê nimite esto û ma nêeşkenê malumatêk biherînî. Lajê mi 15 serrî yo û se ra 99.9 astengdar o. Lajê mi mecburo ke girêdayeyê kesêk bibo û bi no hawa bicuyo. Ez û domanê xo xebitîyenî û kesêk çin o ke biewno lajê mi. Ma wazenê ke doza Zulfîye wextêk kilm de bêra zelalkerdiş û derheqê aye de îdîaname bêro amadekerdiş.”

	 

	‘Wa aqubetê dayika mi dîyar bibo’

	 

	Kênaya Zulfîye Melîke Kişmîre zî wina va: “Sebebê tewqîfkerdişê dayika mi siyaset o. Ma xeylê reyan muracatê dozgerî da, labelê heta nika tu gamêk nêameyo eştiş. Derheqê dayika mi de malumatî nêdîyenê avûkatan daxî. Rewşa birayê mi xirab a. Lazimîya birayê mi bi dayika mi esta. Dayika mi waşt ke birayê mi bigîro hetê xo, labelê ma nêwaştî. Çimkî birayê nêweş o, do senî zindan de bimano. Cayo ke birayê mi tede bimano, ganî pak bibo û mîkrob çin bo. Ma wazenê ke aqubetê dayika mi dîyar bibo. Eke çiyêk bi birayê mi bêro, berpirsîyar dewlet o.”