Serkewtiş yê HDPyî yo û netîceyê keda cinîyan o 

2018-06-25 16:03:45


	 

	AMED - Namzeda HDPyî ya Amedî Ferda Fahrîogluye arde ziwan ke cinîyan bê maben 2 aşman xebatan meşnayî û wina va: “Serkewtiş yê HDPyî yo û netîceyê keda cinîyan o. Ez heme cinîyan rê spas kena.”

	 

	Partîya Demokratîke ya Şaran (HDP) vera heme teda, hêriş û astengîyan de barajê weçînayîş yê se ra 10î derbaz kerde û şîye meclis.  Salîha Aydenîz û parlementera ke şîye meclisî Ferda Fahrîogluye qala netîce û xebatê weçînayîşî kerdî.

	 

	‘Ma do seba azadîya embazanê xo têkoşîn bidî’

	 

	Namzeda parlamenterîye ya Amedî Salîha Aydenîz û Ferda Fahrîoglu derheqê babeta weçînayîşî de qisey kerdî. Salîhaye qiseykerdişê xo de dîyar kerde ke ê xebatanê weçînayîşî de zanayêne ke do HDP barajê weçînayîşî derbaz bikero û wina va: “Hetê derbazkerdişê barajî de problemê HDPyî çin bî. Problemê hewldayîşê veradayîşê binê barajî de estbî. Ma do tîya ra pê seba azadîya embazanê xo yê zindanan, wedarnayîşê tecrîdî û astengkerdişê qetilbîyayîşê cinîyan têkoşîn bikerî.”

	 

	‘Ez seba cinîyan spas kena’

	 

	Ferda Fahrîogluye zî qiseykerdişê xo de bale ante barajê weçînayîşî ser û wina va: “HDP barajî derbaz kerd. AKP va ma do şima bikerî sindoqan, la ê kewtî sindoqan. Prosesê xebatanê weçînayîşî de cinîyî bêmaben xebitîyayî. Şima zanê ke heta 24ê Hezîrane tena di aşmî estbî. No prosesî de cinîyan xebatanê bi tesîr meşnayî. Serkewtişê HDPyî netîceyê keda cinîyan de virazîya. Ez heme cinîyan rê spas kena.”