Kesê ke qetlîamê Kobanê de cuya xo vînî kerdbî ameyî vîrardiş 

2018-06-25 14:06:25


	 

	KOBANÊ - Bi munasebetê serrgêra qetlîamê Kobanê keyeyê kesê ke qetlîamî de cuya xo vînî kerdbî înan vîrardî.

	 

	25ê Hezîrana 2015î de çeteyê DAIŞî bi hawayo nimite û piştîdayîşê Tirkîya derbazê Kobanê bîyî û qetlîam pê ardî. Xeylê cinî û domanî qetlîamê Kobanê de cuya xo vînî kerdî û hetê çeteyan ra ameyî qetilkerdiş. Keyeyê kesê ke cuya xo qetlîamî de vînî kerdî, Endamê Îdarekarê Xoser, Konreya Star, TEV-DEM û Hêzê Pawitişî şîyî mezelê ke kesê ke qetlîamî de cuya xo vînî kerdî ser. Merasîmê vîrardişî de deqeyek rêzgirewtiş ame tepiştiş û dima ra Endamê Îdareya TEV-DEMî Ehmed Şêxoyî qisey kerd. 

	 

	Ehmed Şêxoyî qiseykerdişê xo de wina va: “Şarê kurdî xeylê reyan rastê qetlîaman ameyo û qetlîaman reyde rî bi rî mendo. Labelê reyna zî ma fek têkoşînê xo ra vera nêdayî.”

	 

	Badê qiseykerdişan keyeyê şehîdan mezelê merdimanê xo ser de findan tafînayî.