Rîham Hicoye: Edî wext wextê dîyarkerdişê qederê xo yo 

2018-06-18 15:57:55


	 

	Nupelde Tekoşîn/ Delîla Axîn

	 

	ŞENGAL - Hemsereka Meclisê Xoserîya Demokratîke ya Şengalî Rîham Hicoye qala averşîyayişê leşkerî, siyasî, tesîrê kurdê êzidî, vindetiş û nizdîbîyayîşê kurdê êzidîyan kerde.

	 

	Hemsereka Meclisê Xoserîya Demokratîke ya Şengalî Rîham Hicoye qala averşîyayê leşkerî û siyasî kerde. Rîham Hicoye mîyanê qiseykerdişê xo de qala tecrîdo girankerde ke 19 serrî yo  Rayberê PKKyî Abdullah Ocalanî ser de yeno ramitiş, dagirkerîya dewleta tirkî ya başûrê Kurdistan, tehditê vera Şengalî, dagirkerdişê Efrînî, weçînayîşê 24ê Hezîrane yê Tirkîya û statuya Şengalî kerde.

	 

	Rîham Hicoye destpêkê qiseykerdişê xo de bale ante tecrîd û planê dewleta tirkî yê Îmrali ser û wina  va: “Dewleta tirkî do tu netîceyêk tecrîdî ra nêherîna. Rayber Apo seba heme komelê bindestan roşn o. Şarê binset bi fehm û felsefeya Rayber Apoyî xo bi rêxistin kerd. Dewleta tirkî hewl dana ke ma fehm û felsefeya Rayber Apoyî ra dûrî bikera. Cok ra xeberanê zuran serwis kena û wazena ma bêomid vera bida. Dewleta tirkî komploya 1999î de sernêkewt û do sernêkewo zî.”

	 

	'Çimkî bêvengî yena mehneya ortaxî'

	 

	Rîham Hicoye dewamê qiseykerdişê xo de qala muhîmîya azadîya Ocalan û hêrişê başûrê Kurdistanî kerde û wina va: “Ma sey komelê êzidî xo bi fehm û felsefeya Rayber Apoyî perwerde kerde. Şarê êzidî tecrîdo girankerde qebul nêkeno. Fermanê 3ê Tebaxa 2014î  bi piştîyê dewleta tirk, Erdogan û çeteyanê DAIŞî ame kerdiş û hetê şervananê PKKyî ra veng ame vetiş. Ma bêvengîya hêzê mîyannetewî yê vera tecridî şermizar kenî. Çimkî bêvengî yena mehneya ortaxî. Dewleta tirkî tarîx ra nata hêrişê qezencanê şaran kerda.”

	 

	'Serkewtişê HDPyî, serkewtişê heme şaran o'

	 

	Rîham Hicoye qiseykerdişê xo yê peyênan de wina va: “Tewrê çeteyanê DAIŞî hêrişê Şengal û Efrînî kerdî. Nika zî hêrişê başûrê Kurdistanî kenî. Çimê heme kesan vera de tebîet, ca û warê sivîlan kenî. Dewleta tirkî har bîya û ver bi çinbîyayîşî şona. Wa baş bizanî ke no şar xo bi felsefeya Rayber Apoyî rêxiztin kerdo. Ma veng danê heme şarê Tirkîya ke roja weçînayîşî şêrî sindoqan ser û rayan bidî HDPyî. Serkewtişê HDPyî, serkewtişê heme şaran o. Edî wext wextê dîyarkerdişê qederê xo yo.”