Kuçe bi kuçe xebata weçînayîşî meşnena  

2018-06-13 12:29:00


	 

	Berîtan Canozer

	 

	STENBOL - Namzeda HDPyî ya Mintiqaya Yewin a Stenbolî Şehrîban Alkişe ke pereyê simîtî kêm kerde û market ra ‘wesayîtê weçînayîşî' kîra kerde, balonê rengînan bi wesayîtê xo daliqnayê û kuçeyê Kadikoyî de vilawikan vila kena û wina vana: "Sîstemê vengî, wesayîtê luks û kolon çin ê. Îmkanê ma kêm ê. Wextê ma zî tayo la ma xurt ê. Çi destê ma ra bêro ma do bikerê."

	 

	Namzeda Mintiqaya yewin ê Stenbolî ya HDPî Şehrîban Alkişa 23 serrî û wendekara Beşa Komelî ya Unîversîteya Marmara de ya, her çar hetê Stenbolî xebatan meşnena û waran de zî vengdayîşê ‘rayan bidê HDPî’ kena. Şehrîbane dimayê ke bena namzede, pereyê simîtê xo kêm kena û wesayîtêke weçînayîşî kîra kena.

	 

	Wesayîtê aye weçînayîşî otomobîlêke luksî nê, erebokê marketan seba dayîş û girewtiş yenê xebitnayîş xebitnena. Afîş zî çap kerda, balon girewta û sepete zî bi vilawikan pir kerda.

	 

	Şehrîbane xebate xo wina va: "Mi waşt ma hem rengê HDPî û hem zî rengê ciwanan bidê mojnarayîş. Seba nê çi destê ma ra ame ma kerd. Ma balonan dayî ro, afîşê Selahattîn Demîrtaşî, flamayê HDPyî ma dayî ro. Xeylê bale ant. Yê derûdorî sempatîyêke pîl mojnayî ra."

	 

	‘Ma mecburê vengê xo bidê eşnawitiş'

	 

	Şehrîbane da zanayîş ke xeylê endam, xebatkar, îdarekar û namzedê serekomarî yê HDPî tepişnayeyê û va verê ey de HDPyî problemê ekonomî zî cuyenê û va pêwa her çî do destê înan bêro bikerê û vengê xo bidê eşnawitiş.

	 

	Şehrîbane qiseykerdişê xo wina dewam kerde: "Ma bi piştdayîş pere kom kerd û megafon girewt. Zêde baş nîyo û veng baş nêvejîno. Ma market ra erebok bi pere kira kerd. Dima ra ma dest bi xebate kerde. Xebatê cîya û rengîn şarî kêfweş keno. Her kes eleqeyêke pîl mojneno ra. Ma do bi wesayîtê xo yê marketî barajan birijnê."