Seba Cemîle Aydine piştdayîşêke zî Mexmûr ra ame 

2018-05-28 14:05:36


	 

	MEXMÛR - Dayîkê Mexmûrî piştdayîş dayî dayîkê aştîye Cemile Aydina ke Îzmîr de lîsteyê weçînayîşê yê HDPî de ca girewta.

	 

	Weçînayîşê 24ê Hezîrane rê çend roj mendê. HDPî lez da xebatê xo yê weçînayîşî. Heme namzedî mintiqayê xo de geyrenê û piştdayîşê şarî wazenê. Mîyanê 220 ten namzedê cinî yê lîsteyê HDPî de dayîka aştîye Cemile Aydina 68 serrî Îzmîr de bîya namzede esta.

	 

	Dayîka Cemile Mintiqaya 2yîn ê Îzmîrî verendama HDPî ya. Heme dayîk hewl danê xo biresnê xebatan û seba dayîka Cemile çîyêke bikerê. Dayîkê Wargehê Şehîd Rûstem Cûdî (Mexmûr) zî piştdayîşê xo seba dayîka Cemile mojnayî ra. Dayîkanê Mexmûrî ra Fatma Kara da zanayîş ke aye serê heme dayîkê Mexmûrî piştdayîşê dayîka Cemîle kenê.

	 

	'Ganî heme dayîkî seba Cemîle bixebityê'

	 

	Dayîka Fatma sere de heme dayîkî seba HDPî xebityenê selam kerde û wina va: "Ma dayîkê Mexmûrî heme piştdayîşê Dayîka Cemile Aydine kenê. Aye temsîlkara ma heme dayîkan a. Do reya yewin dayîkêke bi fistanê sipî biko meclîs, no semed ra ganî heme dayîkî seba serkewtişê Cemile bixebityê."

	 

	'Ma Mexmûr ra heta Îzmîr piştdarê Cemîle yê'

	 

	Dayîka bi nameyê Hacer Kara zî piştdayîşê xo seba dayîka aştiye Cemile Aydine wina va: "Ma Mexmûr ra heta Îzmîrî piştdayîşê dayîka Cemile kenê. Ma serkewtiş aye rê û heme dayîkan rê wazenê. Wa bizanê ke ma zerrî ra û gan ra verê aye de yê. Dûrbîyayîş hemverê xebatan nîyo. Tîya ra çi destê ma ra bêro ma do seba dayîka Cemile bikerê."