Ocaxa kirêcî Qoserijan tehdîd kena: Nêweşîya astimî zêde bîya  

2018-05-25 09:51:22


	 

	MÊRDÎN - Ocaxa kirêcê yê serê rayîrê Qoserî de, hem weşîya şarî û hem zî xoza tehdîd keno. Sevîm Aburşu va bi hîrê serrî yo ocaxe bê fîltre xebitêna û wina va: "Toz û dumano ke ocaxe ra vejêno, rayîr ver nêweşîyê astimî akeno."

	Ocaxa kirêcî yê hetê Nuhoglu Kireç A.Şî ra 6 serrî yo yena xebitnayîş, serê rayîrê Qoserî de ca gêna. Ocaxe merdiman, xoza û ganeyan tehdîd kena. Koyo ke xebat ci yenê kerdiş heme ameyo parçekerdiş û kerrayê ke virazyayê zî cuya karkeran û raywanan kenê xeter. Ocaxa ke nîna zanayîş çend serrî îhaleya aye esta, zirarêke pîl dana hemwelatîyê dewa Îstasyonî. Hemwelatîyan va seba dumanî nêeşkenê boy bigîrê û ganî çareserî bêro vînayîş.

	'Hîrê serrî ya bê fîltre yena xebitnayîş'

	Sevîm Aburşu ke mintiqaya Îstasyonî de nêzdîyê karî nişnena ro va bi hîrê serrî yo ocaxe bê fîltre xebityena û semedo ke fîltre nîna bicakerdiş dûman heme dewan de vila beno. Sevîme wina va: "Bi 5-6 serrî yo fabrîka tîya estê. Xeylê zirar dano ma. Bi taybet hîrê serrî yo nêweşîya astimî zêde bîya. Ma şandînan nêeşkenê vejyê teber. Ma nêeşkenê xalîyanê xo zî bişoy. Zereyê keyeyê ma heme duman beno.

	 'Muracatî bênetîce manenê'

	Sevîme da zanayîş ke înan muracatê her ca kerdê la netîceyêke nêgirewtê û wina va: "Ez nêweşa astimî ya. Bi di serrî seba dumanî tewr giran bîyo. Xeylê xo domanê dewe nika nêweşê astimî yê. Wexto ke domanî şinê dewe fekê xo gênê. Heme dewijî bi gazinc ê. Wayîrê şîrketî Şakîr Nuhoglu seba ‘xêrî’ camî merkez de viraşto la nêeşkeno  filtreyêke bido ocaxe ro. Ma do hemverê nê çî têkoşîn bikerê."