Bi qasê pereyê to ti namzed a: Seba ke 6 hezarî aye çinbi lîsteyê CHPî de ca nêgirewte 

2018-05-23 10:30:20


	 

	Melîke Aydin

	 

	Îzmîr - Kisbes Aydina ke Îzmîr de muracatê CHPî seba vernamzedî kerde, semedo ke 6 hezarê aye çinbi lîste de ca nêgirewte. Kisbes Aydine va: "Siyaset mekanîzmayê probleman rê çareserî bîyaro yo. Hemverê sîyaseta lêşin yê pere wayîrê vatişî yo, gerek sîstemê fermuarî bêro ardiş."

	 

	Sereka Meclîsê Cinîyan Konseyê Bajarê Îzmîrî Kisbes Aydine seba weçînayîşê 24ê Hezîrane CHPî rê seba namzedî muracat kerde. La 6 hezar ci ra ame waştiş û seba nêbîyayîşê pere lîste de ca nêgirewte.

	 

	‘Gerek sîyaset bi pere nêro kerdiş'

	 

	Kisbese va seba sîstemê fermuarî weçînayîş de bibo qanûn ganî cinî têkoşîn bikerê û seba vernamzedîyê cinîyan pere nêro girewtiş. Cinî hetê ekonomî de bê îmkan ê. Kisbese va aye mamsoteya teqawîtî ya û  6 hezar Tl reyke de nêeşkaya bido. Kisbese arde ziwan ke sîyaset sey hacetê rantî vînenê û sîyaset lêşin meşnenê.

	 

	‘CHP de kota, MHPî de cinî çin ê'

	 

	Kisbese da zanayîş ke sîyaseto pak cinî eşkenê bikerê la pereyê înan çin o: "Mi eşnawit ke HDP pere cinîyan ra nêgîno. No averşîyayîşêke zaf baş o. Esas de gerek ma dir zî çinbibayne. Ganî her partî sîstemê fermuarî bi ca bîyaro. Seba cinî sîyaset de ca bigîrê, gerek heme cîyayî hetêk ra bêrê verdayîş û hemparîya zayendê komelî de bêrê têhet. Hemverê otokrasîyê camêrdan gerek sîstemê fermuarî bêro dayîş. Sîyasetê lêşin ke pere wayîrê vatişî yo, gerek her cinî partîya xo de sey askî tevgerê cinîyan ê xoser têbigeyro." Kisbese arde ziwan ke rewşa cinî bibê yew do dinya cayê xo ra bileqo.