Amed de nebzê weçînayîşî: TEMAM 

2018-05-23 10:23:30


	 

	Gulîstan Azak

	 

	AMED - Amedo ke yew bajarê tewr polîtîk ê Tirkîya yo, tercîhê cinîyan 24ê hezîrane de zelal o: TEMAM.

	 

	Amed de xebatê weçînayîşê bêmabên dewam kenê û şar do 24ê Hezîrane de tercîhê xo bikero. Meydanê Berê Koyî de ma mîkrofon cinîyan rê kerd derg û pesê ma cewab kerdî.

	 

	'Raya mi HDPî rê ya'

	 

	Mizgîn Uskute dîyar kerde ke aye raya xo dana HDPî ke Kurdan paweno û wina va: "Ma tewqîfkerdişê Selahattîn Demîrtaşî şermezar kenê. Ganî serbest bêro veradayîş." Vahbîye Yilmaze zî tewqîfkerdişê namzedê serekomarîyê HDPî Selahattîn Demîrtaş rexne kerde û wina va: “Aramîyê welatî girêdayîşî HDPî yo. Ez 24ê Hezîrane de raya xo dana xo."

	 

	‘Ez partîya xo vurnena’

	 

	Ayşe Şahîne zî arde ziwan ke seba Tirkîya kaos ra vejyo do partîya ke raya xo dayne ci bivurno û wina va: "Seba rejîmê yew camêrdî meydan ra wedaryo ma raya xo danê HDPî. Ganî problemê cinîyan yê azadî bêrê rojeve."

	 

	‘Gerek ma vajê Temam’

	 

	Fatma Demîre da zanayîş ke AKP 16 serrî yo îqtîdar o û gerek êdî destur nêro dayîş ke welat hende biko evqas tengasî û no semed ra vacê Temam.

	 

	Leyla Karamane zî wina va: “Wendekarê unîversîta nînê tayînkerdiş. Yê ke îmtîhanan de puanê berz gênê zî rastê astengîyê mulakatî yenê. Îqtîdar kesê ke nêzdîyê xo gêno. Partîya ke weçînayîşan qezenc bikero ganî problemê perwerdî çareser bikero.”

	 

	‘Keyeyê ma xira kerdî’

	 

	Ozgur Nehîr va ke ê qedexeyê tebervejyayîşê Sûrî de mexdur bîyê û va keye û kargerîyê înan ameyê rijnayîş, îstîmlak kerdê û înan taxa înan ra dûrvistê.

	 

	Latîfe Boze zî bale ante serê krîzê ekonomî û va netîceyê weçînayîşan vejyo gerek problemê ekonomî çareser bikero.

	 

	Sosin Gungure zî wina va: “Qerarê weçînayîşî wendekaran mexdur kerdo. TBMMî de hûmara parlamenterê cinîyan kêm a. Ma wazenê no weçînayîşî de tewr zêde sîyasetmedarê cinî parlamento de ma bivînê."