Efrînijê ke aşma Remazanî konan de derbaz kenê: Fitarî bi malê ma yê heram akenê 

2018-05-20 09:27:13


	 

	Tolin Muhamed-Lilav Eli

	 

	ŞEHBA - Efrîniyê bi xeylê problemê weşî, wayîrbîyayîş û starbîyayîşê çadirê Remazanî pêşwazî kerdî wina vatî: "Binê nameyê îslamîyetî de her tewir qirkerdiş kenê. Vanê ma roje yê. La fitarîya xo bi malê ma yê heram akenê. No nakokîyêke senîn o. Talan kenê û dima ra vanê 'ma musluman ê'."

	 

	Komê girêdayê Hêzê Çekdarî yê Tirkî (TSK) 20ê Çele de hemverê Efrînî hêrîş dayî destpêkerdiş û netîceyê hêrişan de bi sehezaran kesî warê xo ra bî. Efrînîyê ke Kantonê Şehba bica bîyê û benda roja ageyrayîşî yê bi xeylê probleman ke sere de weşî yena Remazan pêşwazî kerdî.

	 

	Esum Muhamede hêrişê hemverê înan ca ameyo ard vîr û wina va: "Erdogan û çeteyê xo bi çimsurîyêke pîl hêrişê herra ma kerdî. Bi teyereyan keyeyê ma xira kerdî. Ma nê wehşetî xo vîr ra nêkenê. Ma 58 rojan xo ver da. Ma do seba Efrînî pîya xo ver bidê. Erdogan dişminê merdîmayî yo. Ma herra ma ra kerd. Ma nika bi roje yê. Tîya Efrîn nîyo. Tîya zaf germ o."

	 

	'Binê nameyê îslamîyetî de qirkerdişan kenê'

	 

	Esume arde ziwan ke nika çete û keyeyê xo keyeyê ma de bi ca bîyê û wina va: "Çeteyê xo herra ma de bi ca kerdî. Ê vanê qey do herra ma înan rê bimano. YPJ û YPGî her wext ma pawitî. Ma do Efrîn azad bikerê û serewedartiş şêrê uca. Ma bi nê hêvîyan cuwîyenê. Binê nameyê îslamîyetî de her tewir qirkerdişan kenê. Nêvanê cinî, domanî hemine kişenê. Dima ra zî yenê qalê îslamiyetî kenê. Qirkerdişan kenê û qalê birayî kenê. Gelo do kam bawer bikero? Ma cinîyê Kurd do qetî bi vatişê yê sexte bawer nêkerê. Vanê 'ma bi roje yê' û fitarîyê xo bi malê ma yê heram akenê. No nakokîyêke senîn o."

	 

	'Nêeşkenê şarê Kurdî bikerê kole'

	 

	Siyam Henane zî reaksîyonê xo wina arde ziwan: "Wa tu kes wayîrê Efrînî nêvejîyo. Efrîn ê ma yo. Erdogan dişminê çar parçeyê Kurdistanî yo. Nêwazenê şarê Kurd bi hawayêke azad bicuwîyo. No semed ra hêriş kerdî. Ma sey şarê Efrînî çîyê ke Erdogan û Rûsya bi ma kerdo nêkenê xo vîr ra."

	 

	Zeluh Elo zî wina va: "Her ca xoverdayîş, her ca seba ma Efrîn o. Erdogan vano qey ma mehkumê çadiran kerdo. La ma Efrînij ê. Se beno wa bibo xoverdayîş kulturê ma yo. Erdogan kiştoxê domanan o. Binê nameyê îslamîyetî de sîyasetê lêşin keno. Wa Erdogan bêro binê nê germî de roce bigîro ma zî bivînê."