Sara Kaya pêwa îddîanameyo aberviste nîna tahlîyekerdiş 

2018-05-04 09:20:40


	 

	MÊRDÎN - Hemşaredara Nisêbînî Sara Kaya aşma  Gulane de do vejê dadgehe, bi 'muebetê giran' yena hukmkerdiş. Sara pêwa îddîanameyo ameyo abervistiş zî hema zî nîna tahlîyekerdiş.

	 

	5in roniştişê dewaya hemşaredara Nisêbînî Sara Kaya ke 13ê Çele Nisêbîn de eştişê serê keyan de amî tepiştiş û 14 rojî ra dima amî tewqîfkerdiş 11ê Gulane de yena vînayîş. Saraya 4in Dadgeha Cezaya Giran ya Mêrdînî de yena  hukmkerdiş, bi îdiaya 'yewîya dewlete xira kerda' bi cezaya 'muebetê giran' yena hukmkerdiş.

	 

	'Şahidan îfade peyser ant'

	 

	Sara ke bi serrêke û nîm tewqîfkerdeya, roniştişê peyîn de bi SEGBÎSî beşdar bî. Dosya de pêroyî de îfadeyê 9 şahidê nimte û akerde estê û tena şahidêke îfadeyê xo pawit. Derheqê Sara de 9 aşmî ra dima îdianame ame amadekerdiş û îdiname de seba pêvînayîşê telefon û îfadeyê şahidê nimte yena hukmkerdiş. Pêwa ke şahidan îfade peyser antê û îddianame aberviste zî nîna tahlîyekerdiş.

	 

	Şahid Sîraç Yuksek bi SEGBÎSî îfadeyê ey amebi girewtiş û vatibi: "Îfadeyê mi emnîyetî rast nîyê. Nê îfadeyî aîdê mi nîyê. Îfadeyê ke polîsan nuştê." Şahid Ahmet Altay zî va: "Îfadeyê mi emnîyetî dayê rast nîyê. Ez binê îşkenceyê giranan ra derbaz bîya. No semed ra çîyêke nîno vîrê mi. Ez kesêke bi nameyê Sara Kaya nas nêkena." Şahid Zehra Kaya û Jiyan Ay zî eynî îfade dayî û îfadeyê xo peyser antî.

	 

	Bahattîn Îlham kam o?

	 

	Şahidan ra Bahattîn Îlhano tena ke no prosesî de derheqê 235 kesî de îfade da, îfadeyê xo peyser nêant. Bahattîn Îlhano ke derheqê qedexeyê tebervejyayîşê kuçeyan de yê derheqê Sara Kaya de îfade dabi û nê îfadeyî hetê heyetê dadgehe ra sey delîl yenê qebûlkerdiş. Goreyê îddîayê kesê wextê qedexeyan de mabêne xendekan de bîyo, û goreyê îddîayan nika qorîcî yo.

	 

	Avûkat: Dadgehe delîlan nêvînena

	 

	Roniştişê yewin de di şahidê ke îtîraf kerdî binê îşkencê û zorî de îfade dayê, nika xo nêresneno. Çarçeweya îdianameyo ke tena bi îfade yeno ferzkerdiş de Sara yena hukmkerdiş. Avûkatê Saraye dîyar kerd ke dimayê îfade peyser ameyê antiş, dadgehe seba sucî delîl nêdîya û va no qerarêke sîyasî yo, hukmkerdiş merheleyêke adîlane de nîno kerdiş.