Berîvanan ra reaksîyonê hemverê qedexeyan 

2018-05-03 09:23:08


	 

	Dîlan Babat

	 

	COLEMÊRG - Şemzînan de bi ameyîşê wisarî dir cinîyê ke xoza kenê xo verike reaksîyon hemverê qedexeyê zozanan dayî û vatî: "Ma parçeyê nê koyan û zozanan ê. Yê qerekol zozananê ma de viraştî wa qedexe û qerekolê xo bigîrê û ma rehet verdê."

	 

	Zozanê nêzdîyê dewa Sîrînusa yê Şemzîzanê Colemêrgî, dimayê zimistanî wisar de xo bi hezar rengê zergûnayî xemilênê. Cinîyê ke verê xo danê zozanan qedexeyê ke ameyê îlankerdiş zî nas nêkenê. Cinîyê ro hetêke ra heywanan çernenê heto bîn ra zî nebatê bi şifa kom kenê.

	 

	Esma Toreya 30 serrî yo bêrîvanî kena û di serrî yo seba qedexeyan pesê xo ra feyde nêgîna. Esma wina dewam kerde: "Seba problemê debare xeylê kesî keyeyê xo terk kerdî û şî. Tîya de para qedexeyan zaf zêde yo. Zozanê ma qedexe kenê. No zî ma zaf xemgîn keno. Ez hewl dana pes zozanê tewr nêzdî de biçernî. Nika xeylê cayê dewa ma de qerekolan awan kenê. Ma dûr bikoy do ma bikşê."

	 

	'Wazenê ma cuya dewe ra qût bikerê'

	 

	Esma arde ziwan ke pêwa dewe nufusêke kêm esto zî yê mîyanê cuyake kolektîf de yê û wina va: "Dewlete sena nê cuwîyayîşî peynî bikera  zozan qedexe kerde. Xeylê çî cuya dewe bêra qalîkerdiş estê. Cinî-camêrdî her kes karê kolektîf de yê. ewro ez karêke bikerî mêrdeyê mi zî karêke bîn keno. Tena keyeyê mi de nê, her cayê dewe de derbaz beno. La bi di serrî  zozanê ma yenê qedexekerdiş.

	 

	Zeynep Tore zî reaksîyon qedexeyan rê mojna ra û va bi wisarî dir xoza zergûn bena û seba  qedexeyê zozanan çimeyê debare qedyay û va wa dest zozananê înan ra biancê.