'Mesajê kedkeran 1 Gulane de do bibo cewabê 24ê Hezîrane' 

2018-04-27 09:30:27


	 

	Habîbe Eren

	 

	ENQERE - Hemsereka Pêroyî ya KESKî Aysun Gezene dîyar kerde ke 1ê Gulane de bi şîarê 'Seba Tirkîyayêke verê kede de ma yewîye û piştdayîşî girs bikerê' do Warê Tandoganê Enqere de bê. Aysune dîyar kerde ke îqtîdar vîna ke bi OHAL û şer bîyayîşê xo garantî bikero, weçînayîş kerdo rojeva xo û va kedkar cewabê weçînayîşî do 1ê Gulane de bidê.

	 

	Hemsereka Pêroyî ya KESKî Aysun Gezene derheqê 1ê Gulane û weçînayîşê 24ê Hezîrane de şîrove kerde. Aysune ard ziwan ke wexto ke dest bi amadekarîyê 1ê Gulane kerdê hema weçînayîş rojeve de nêbîyo û va Tirkîya bi rojevê KHK û OHALî yena îdarekerdiş. Aysûne wina va: "Hemver kedkar û kesê sîyasetê demokratîk kenê tedayê cidî estê. No semed ra zî şîarê ma zî 'Ma seba Tirkîyayêke hetê kede 1ê Gulane de têkoşîn û piştdayîş girs bikerê' yo."

	 

	'AKP dewamê projeyê 80ê heta ewro yo'

	 

	Aysune vatişê Erdogan yê sey 'Ewro fabrîkayan de yew grevêke çin o, ma hema pelçiqnenê' ard vîr û wina va: "No bi hewayêke eşkera yeno manaya ke ma seba heqê kedkaran bigîrê dest OHAL sefer kenê yê. Ewro hemverê nê caardişan qetî têkoşîn lazim o. Heqê ma xesp kenê. No reyke bîn zî vejyaw meydan. AKP dewamê projeyê serran ê 80 heta ewro ameyo."

	 

	'Kedkarî do 1ê Gulane de cewab bidê'

	 

	Aysune arde ziwan ke amadekarîyê 1ê Gulane temam bîyê û wina va: "Ma do heqê xo waran de biqîrê. 1ê Gulane bi weçînayîşê rew ra tewr zêde girîng bîyo. Kedkarî do cewabê lazim 1ê gulane de bidê polîtîkayê AKPî. Ma do 24ê Hezîrane hetê AKPî yê dişminîyê cinî û domanan teşîr bikerê. Ma zanê ke îqtîdarê bi OHAL û KHKî 110 hezar kes bê kar mendê û bi tu hewa peyser game nêerzeno. Ma zî bi meşnayîşê têkoşînî de bi qerar ê.

	 

	Ganî rejîm bêro berhetkerdiş

	 

	Aysune dewam de va AKP bi OHAL û şer bîyayîşê xo garantî nêkerdo hewl dano bi weçînayîşî serdegirewtişê ca bîyaro û va do cinî û kedkar qetî destûr nêdê ci. Aysune da zanayîş ke hêrsê şarî hemverê AKPî xeylê pîl bîyo û va verê heme çî ganî no rejîm bêro berhetkerdiş.

	 

	 Aysune peynîya qiseykerdişê xo de va ke weçînayîş de xîle bibo zî do seba asayîşê sindoqan seferber bê û va sey KESKî na babete munaqaşe kerdê û kerdê rojeva xo û va do xeta têkoşînî dîyar bikerê. Aysune heto bîn ra da zanayîş ke cinî verê heme qedexeyan de 8ê Adare de kuçeyan de bî û va: "Cinî do her wext wayîrê ked û cuya xo vejyê. Warê 1ê Gulane zî no het ra îmkanêke pîl o. Cinî do bi heme coşê xo waran de bê. Ez veng dana heme kîştan ke 1ê Gulane de waran de bê."