Cinîyê zozanan: Qedexekerdişê zozanan beno sebebê mergê heywanan 

2018-04-09 14:06:44


	 

	
		Zeynep Durgut - Hîkmet Tunç
	
		 
	
		WAN - Kesê ke herêma Serhedî de cuyenî, debara xo bi miqatekerdişê heywanan kenî. Badê polîtîka û rewşa OHALî xeylê zozanan de qedexeyî ame îlankerdiş û qedexe hema zî domena. Hemwelatîyê ke her serr heywanê xo demserrê wisarî de berdêne zozanan, emserr qedexeyê herêman vera nêeşkenî şêrî zozanan.
	
		 
	
		Kesê ke herêma Serhedî de cuyenî, debara xo bi miqatekerdişê heywanan kenî. Badê polîtîka û rewşa OHALî xeylê zozanan de qedexeyî ame îlankerdiş. Rewşa OHAL û qedexeyê herêman vera hemwelatîyê zozanan nêeşkenî êdî heywanan miqate bikerî. Wayîrkerdişê heywanan êdî zehmetin bîyo. Hemwelatîyê herêma Serhedî polîtîkayê qedexekerdişê zozanan vera, nêeşkenî heywananê xo bibî zozanan û heywananê xo taxan de çerênenî. Cinîya bi nameyê Hamaîl Îtake taxa Bostanciyî ya qezaya Riya Armuşî de heywanan miqate kena û nêeşkena heywananê xo biba zozanan. Hamaîle arde ziwan ke bi qedexekerdişê zozanan wazenî ke çimeyê debara hemwelatîyan raste ra wedarnî.
	
		 
	
		‘Ma qedexeyê zozanan vera taxan de heywananê xo çerênenî’
	
		 
	
		Hamaîle destpêkê qiseykerdişê xo de dîyar kerde ke ê wazenî şêrî zozanan û wina va: “Ma mecburî taxan de heywananê xo çerênenî. Ma dewa Ferxînîsî ra yî. 20 serrî yo ke ma dewa xo ra koçî kerdî. Bajar û qezayan de miqatekerdişê heywanan zehmet o. Ma serê sibay lez wirzenî û taxan de heywanan çerênenî. Ma bi miqatekerdişê heywanan debara xo kenî. Qedexeyê herêman vera ma nêeşkenî şêrî zozanan. Hemwelatîyî taxan de heywanan miqate kenî. Ma zehmetî ancenî. Ma demserrê wisarî de heywanan berdêne zozanan û çerênayêne. Ez û jintîya xo, ma şiwanîya heywanan kenî. Ma heywananê rê deryan vanî. Ma bêrîya zozananê xo kenî. Zozanê ma her serr yenî qedexekerdiş. Eke wina şêro do heywanê xo bimirî.”
	
		 
	
		‘Bi qedexekerdişan wazenî ke çimeyê debara ma bigîrî’
	
		 
	
		Hamaîle dewamê qiseykerdişê xo de wina va: “Heywanî zozanan de yenî miqatekerdiş. Cografyaya ma zaf dewlemend a. Ma heme çîyê tebîetî ra feyde herînenî. Wexto ke merdim biwazo, eşkeno heme çîyan bikero. qedexekerdişê zozanan nînê qebulkerdiş. Ganî demserrê wisarî de heywanî şêrî zozanan. Bajar û qezayan de miqatekerdişê heywanan seba înan zirar o.”
	
		 
	
		‘Qedexekerdişê zozanan heywanan mirnenî’
	
		 
	
		Cinîya binameyê Zehra Peyane zî qiseykerdişê xo de bale ante qedexekerdişê zozanan ser û wina va: “Bajar û qezayan de miqatekerdişê heywanan zehmetin o. Hemwelatîyî zehmetî ancenî. Bi serran o ke hemwelatîyê bajarê Wanî bi miqatekerdişê heywanan debara xo kenî. Nê serranê peyênan de her rojî bi îzehetê walî zozanî yenî qedexekerdiş. Bi nê qedexeyan wazenî ke hemwelatîyan vêşan bikerî. Qedexekerdişê zozanan nîno qebulekrdiş. Ma wazenî ke şêrî zozananê xo û şiwantî bikerî. Hewayê bajar merdiman kişeno. Ganî qedexe bêro wedarnayîş û ma şêrî zozananê xo. Qedexekerdişê zozanan beno sebebê mergê heywanan.”