Eke merkezê cinîyan bivuryo 'Merkezê Keyeyî': Pasta, neqiş û deştiş 

2018-04-01 09:12:34


	 

	AMED - Farqîn de qayûmo ke Merkezê Cinîyan ê Meya vurnay 'Merkezê Piştdayîşê Keyeyî Meya' qursê tîya zî vurna qursê neqiş, deştiş û pasta. Cinîyê ke rastê şîdetî yenê verê înan danê qeymeqamtî û ame zanayîş ke cinîyan bi zor benê mîtîngê AKPî.

	 

	Êlulê 2016an de qayûm tayînê 28 şaredarîyê DBPî bîbî û yew zî ci ra şaredarîya Farqînî bî. Qeymeqam Murat Kutuk bi KHKa amebi tayînkerdiş. Dimayê ke ame tayînkerdiş, dima ra vejya meydan ke qayûm Murat merdimanê xo gêno kar. Heto bîn ra Merkezê Cinîyan ê Meya zî vurna merkezê piştdayîşê keyeyî. Qayûm heme xebatkarê cinî yê kar ra vetib. Qayûm dima ra merkez vurna 'Merkezê Piştdayîşê Keyeyê Meya.' Qayûm qursê 'îngîlîzî' û 'kompîturî' zî wedarna û  qursê kuafur, pastawanî, neqiş deştiş û Kuran akerd.

	 

	Cinîyan bi zor benê mîtîng

	 

	Ame zanayîş ke cinîyê ke seba qursan şinê zî eşrawenê cayê bînan. Cinîyê ke şîdet vînenê ame zanayîş ke eşrawenê qeymeqamtî û ci ra vanê 'ma nêeşkenê bibê hetkar şêrê Qeymeqamtî'. Ame zanayîş ke wextê mîtîng ya zî kongreyêke AKPî virazyo zî cinîyan ra vanê 'beşdarbîyayîşê şima ferz o' û bi zor cinîyan benê mîtîng û kongreyan.