'Qayûm berardişê polîtîkayê dagirkeran o' 

2018-03-31 10:03:46


	 

	MÊRDÎN - Hemsereka Sendîkaya Karê Pêroyîyê DÎSKî yê Mêrdînî Berîvan Dokene Mêrdîn de 129 karkerê şaredarî ke persa ‘Kam Efrîn girewt?’ teberê kadro verdayî, şîrove kerde wina va: "Tayînkerdişê qeyûman roja ewil ra heta nika parçeyêke polîtîkayê dagirkerdişî bi. Piştdayîş û têkoşînê ma yê bi karkeran dir dewam bikero."

	 

	Qeyûmê ke tayînê şaredarîyê DBPî bî hedefê înan ê vernî padayîşê sazgehê cinîyan û dima ra zî vetişê xebatkaran ê kar bi. Yew înan bajarê ke qeyûm ame tayînkerdiş Mêrdîn bi û sebebê cîya xeylê karkerî kar ra ameyî eştiş. Mêrdîno ke heme şaredarîyê ci qayûm ame tayînkerdiş, hewteyê peyîn de 192 kes zî teberê kadro ameyî verdayîş. Ame zanayîş ke karkeran ra persa ‘Kam Efrîn girewto?' ameyo perskerdiş û xebatkarê ke îmtîhan derbaz nêkerdê zî heta 3ê Nîsane wext seba înan ameyo dayîş.

	 

	‘Ma xora kar vera da'

	 

	Hemsereka Pêroyîya Sendîkayê DÎSKî yê Mêrdînî Berîvan Dokene dîyar kerde ke tayînkerdişê qayûman roja vernî ra parçeyêke polîtîkayê dagirkerdişî bi û wina va: "Ez verê ke derbazê sendîka bibî, şaredarî de xebityayne. Ma dî çi virazyayne. Ma zanayne qayûm bi çi amancî ameyê. Xora senîn qayûm ame xora fek kar ra vera da. Dimayê tayînkerdişan vatî, 'ma dest nêdanê karkeran'. La ma nika netîceyê ci baş vînenê. Ma bi vejyayîşê karî ra heqdar bî."

	 

	‘Wazenê rumetê karkeran bişknê'

	 

	Berîvane dewam de ard ziwan ke hewteyê peyîn de şaredarîya Nisêbînî 12, Qoserî ra 71, Mêrdîn ra zî 109 karker bi sebebê îmtîhanî kadro ra ameyî vetiş û pêwa ke cigêrayîşê asayîşî ra derbaz bîyê zî persê sey ‘Efrîn’ û ‘Beyraq’ kar ra ameyî eştiş. Berîvane wina va: "Dimayê tayînkerdişê qayûman bi hezaran karkerî kar ra ameyî eştiş. Wazenê merdiman bi vêşanî terbîye bikerê. Wazenê rûmetê karkeran bişiknê. La tu kitabê tarîxî de nêameyo vînayîş ke karkeran sere tewênaw. Ma do heta peynî heqê xo bipawê."

	 

	‘Xebatkarê cinî nêmendî'

	 

	Berîvane bale ante serê hêrişê hemverê xebatkarê cinî zî û va qezancê cinîyan roj bi roje hetê qayûmî ra ameyê çinkerdiş û no berardişê zîhnîyetê serdest ê camêrdan. Berîvane eynî wextî de da zanayîş ke dimayê qayûman hema hema xebatkarê cinî nêmendê û va do têkoşînê înan dewam bikero.