DEDAŞ cereyanê 280 dewan birna, cinîyî sey raybazanê kehen bîran ra awe ancenî 

2018-03-30 12:23:07


	 

	MÊRDÎN- Bi mehneya ‘fature neameyî dayîş’ û ‘kaçax’  11 rojî yo ke 240 dewanê Mêrdînî de aw û ceyran çin î. Seba ke aw û cereyanê dewan çin î, cinîyî sey raybazanê kehen bîran ra awe ancenî û dîyar kerdî ke çîyê ke nêameyo sereyê înan nêmendo.

	 

	DEDAŞê Mêrdînî, Qoserî de ceyranê 120, Dêrikî de ceyranê 50 û Nisêbînî de zî ceyranê 70 dewan birna. Qezaya Merkezî ya Artukluye de zî cereyanê 40 dewan amey birnayîş. 9 rojî yo ke 280 dewê Mêrdînî de cereyan çin o û hemwelatî nêeşkenî erdê xo awe bidî. Şîrketê Cereyanî yê Dîcleye  (DEDAŞ) bi mehneya cereyanê qaçax û nêdayîşê faturayan cereyanê dewan birna. Birnayîşê cereyanî ver awe zî çin a û hemwelatî nêeşkenî lazimîyê xo bîyarî ca.

	 

	Dewijî êdî nêeşkenî lazimîyê xo yê awe bîyarî ca û erdê xo awe bidî. Babete ser o cinîyê dewe qisey kerdî û dîyar kerdî ke çinbîyayîşê aw û cereyanî ver xeylê probleman cuyenî û seba lazimîyê xo yê ferzî bîran ra awe ancenî.

	 

	‘Ma bi awa bîran roja xo vîyarnenî’

	 

	Cinîya binameyê Emîne Karaaslane qiseykerdişê xo de dîyar kerde ke tewrê kênaya xo çend rojî yo ke awe ancenî û wina va: “Ma nêzanê seba çi wina kerdî. Ma her aşme deynê xo danî. Ma nêzanî ke seba çi awe birnayî. Rewşa ma sey 10 serrî verê cu bîya. Aw û cereyan çin î. Ma rewşêka zehmetin ancenî.”

	 

	Emîneye dewamê qiseykerdişê xo de bale ante şert û mercê zehmetin ser û wina va: “Ma nêeşkenî tu lazimîyê xo bîyarî  ca. Ma bi awa bîran cuyenî. Ma nêeşkenî kincanê xo bişuyî û haletê keyeyî yê teknolojîk nêxebitîyenî.  Ma kincan bi destan şuyenî. Şamê ma teber de adir ser de virazîyeno. Na rewşe tewr zêde cinîyan ser de tesîr viraşta. Ma xeylê problem û zehmetîyan ancenî. Heqê înan çin o kem a mexdur bikerî.”

	 

	Emîneye qiseykerdişê xo yê peyênan de zî bale ante aşma Remezanî ser û dîyar kerde eke wina biba do merdimî senî bicuyî û ganî no zilm bi hawayo lez û bez bêro wedarnayîş.