Naşîde: Newroze de hêrs û reaksîyonê xo bîarên ziwan ser 

2018-03-20 12:31:52


	 

	Rojda Aydin

	 

	AMED - Xebatê amadekarîyê mîtîngê Newroze ke do Amedî de bi sloganê ‘Ma do bi ruhê Newroze xover bidî û Efrînî de qezenc bikerî’ bêra pîrozkerdiş qedîyayî û Amed seba Newroza siba amadeyo. Hemsereka Partîya Herêmê Demokratîkî (DBP) ya merkezê Amedî Naşîde Toprake seba beşdarbîyayîşê Newroze veng daye heme şarê Amedî.

	 

	 Siba xeylê welat, bajar û qezayan de do Roşanê Newroze bêro pîrozkerdiş. Sey her serre emser zî 21ê Adare Roşanê Newroze yeno pîrozkerdiş. Amadekarîyê Newroze resayî merheleya tewr peyên û Amed seba pîrozkerdişê 21ê Adare Roşanê Newroze amadeyo. Na çarçewa de Komîteya Amadekarîye yê Newroze zî seba pîrozkerdişê ke Parqa Newroze ya Amedî de bêro viraştiş, amadekarîyê xo resnayî merhaleya peyêne. Ame musayîş ke muracato ke seba pîrozkerdişî Walîtîya Amedî rê amebî kerdiş zî qebul bîyo.

	 

	Babete ser o Hemsereka Partîya Herêmê Demokratîkî (DBP) ya merkezê Amedî Naşîde Toprake qisey kerde û qiseykerdişê xo de seba beşdarbîyayîşê Newroza siba veng daye heme şarê ke Amedî de cuyenî.

	 

	‘Şar seba beşdarbîyayîşî paweyê roja Newroze yo’

	 

	Naşîdeye destpêkê qiseykerdişê xo de dîyar kerde ke ê destpêkê aşma Adare ra nata amadekarîyê pîrozkerdişê Newroze kenî û wina va: “Ma tax bi tax, keye bi keye û qeza bi qeza gêrayî û amadekarîyê Newroze kerdî. Amadekarîyê ma qedîyayî. Xebatê ma bi coş û kelecanin bî. Ma bi kêfweşî xebatan kerdêne. Wextê xebatan de kêfweşî, kelecan, reaksîyon û hêrsê şaran çimanê înan ra dîyar bîyêne. Her çend ke hêrs bibo zî, şar seba beşdarbîyayîşî paweyê roja Newroze yo."

	 

	‘Xebatê ma do heta roja Newroze dewam bikerî’

	 

	Naşîdeye qiseykerdişê xo yê peyênan de wina va: “Seba pîrozkerdişê Roşanê Newroze destûr amey dayîş. Nika ma Parka Newroze de amadekarîyê peyên yê teknîkî kenî. Heto bîn de qeza û merkezê bajarî de xebatê seba dawetkerdişê pîrozkerdişê Newroze vilawek yenî vilakerdiş û anonsî yenî kerdiş. Ma veng danê heme şarê Amedî ke 7 serrî ra heta 70 serrî bi rengê xo yê neteweyî beşdarê pîrozkerdişê Newroze bibî. Ma wazenî ke şar hêrs, reaksîyon û kelecanê xo Parka Newroze de bîaro ziwan.”