'Newroze de hemverê tecrîdî ma do vengê xo berz bikerê'  

2018-03-17 12:59:08


	 

	Duygu Cînîvîz

	 

	AMED - Amadekarîyê Newroza Amedî bi sloganê ‘Ma do bi ruhê Newroze xoverdayîş girs bikerê û Efrîn de serkewte bê' do bêra pîrozkerdiş dewam kenê. Endama Dîwana KCDî Salîha Aydenîze dîyar kerde ke seba tecrîdê serê şarê Rojhelato Mîyanên û Tirkîya bêro şiknayîş, ganî tecrîdê Îmralî do bêro şiknayîş û va Newroze de do hemverê vengê xo berz bikerê.

	 

	Amed de Newroze emsar bi sloganê ‘Ma bi ruhê Newroze xoverdayîş girs bikerê, Efrîn de serkewte bê' do roja Çarşeme bêra pîrozkerdiş. Seba Newroze xeylê partîyê Kurdistanî, bawerî û Ewropa ra merdimî ameyî dawetkerdiş. Heto bîn ra seba Newroza Amedî xeylê rojnamegeran zî muracat kerd. Endama Dîwana KCDî Salîha Aydenîze derheqê Newroza Amedî de qisey kerde û va: "No prosesî de şexsê Efrînî de heme destkewteyê Kurdan yenê çinkerdiş de ganî kurdî bibê yew û Newroza Amedî de têkîşte yewbînan de bê."

	 

	'Nîyetê înan yê çareserî problemêke çin o'

	 

	Salîha va 2013 de bi nameyê Rayberê PKKî Abdullah Ocalan dir prosesêke tarîxî ameyo destpêkerdiş û prosesê di serrî û nîm de nîyetê Tirkîya problemê Kurd çareser bikerê çinbi û wina va: "Eynî wextî de verê ke proses dest pêbikero, bi qirkerdişê 9ê Çele ya Parîsî seba Kurdan mesajêke ame dayîş. Dima ra hêrişê awanîyê HDPî kerdî û qirkerdiş kerdî."

	 

	'Bi komployê mîyanneteweyî hêrişê Efrînî kenê'

	 

	Salîha ard ziwan ke partîyê Kurdistanî, temsîlkarê bawerîyan zî dawetê Newroza Amedî kerdê û wina va: "Komîteya tertîp heta nika 400 ra zêde kes û temsîlkaran dawetname eşrawitê. Sazgehê çapemenîyê cîya muracatê akredîtasyonî ameyî. Ma do warê Newroze reaksîyonê xo yê hemverê Efrînî bimojnê ra. Dagirkerdişê Efrînî de verê çimê heme dinya sîvîl yenê qetilkerdiş. Ma do warê Newroze de hemverê dagirkerdişê Efrînî vinderê. Ma do vengê xo hemverê tecrîd û hêrişê Efrînî berz bikerê. Ma do tecrîd bişiknê, eynî wextî de ma do venêo hemverê zulm, teda serê cinîyan zî berz bikerê."