Cinîyê Edeneyijî: Ma bi ruhê 8ê Adare adirê Newroze gur bikerê 

2018-03-15 14:10:06


	 

	Fîlîz Zeyrek

	 

	EDENE - Temsîlkara HDP, DBP û EMEPî seba Newroza Edeneyî veng dayî û dîyar kerdî ke do cinî Newroze bi ruhê 8ê Adare pêşwazî bikerê.

	 

	Edene de amadekarîyê Newroze dest pêkerdî û seba pîrozbayîyê 21ê Adare mabêne 10.00-18.00 de Tîyatroyê Hewaya Akerdî Mîmar Sînan virazyo muracat kerdî. Temsîlkarê partîyê sîyasî veng dayî beşdarbîyayîşê heme şaran kerdî û vatî do cinî Newroze bi ruhê 8ê Adare pêşwazî bikerê.

	 

	'Hemverê faşîzmî ganî ma Newroze de bê'

	 

	Hemsereka HDPî yê Seyhanî Kader Dumane ard ziwan ke ê bi şîarê 'Newroze roja xoverdayîşê hemverê faşîzmî de newe ra û pîya. Do faşîzm birijyo do şar qezenc bikero' emsar waran de yê û wina va: "Pêwa heme tedayan ma waran de bê. Ez sere de veng dana cinîyan û heme şaran kena ke waran de bê. Nasnameyê şaran yeno çinkerdiş, ziwanê înan, kulturê înan yeno çinkerdiş. Cinî cîya yenê vînayîş. Keda înan nêro vînayîş. Cinîyê 8ê Adare de vejyayê waran 21ê Adare de zî vejyê meydan. Sere de hemserek û parlamenterê ma tepişnayeyê. Heqê ma yenê xespkerdiş. Seba nê hêrişî veng vejyê ma waran de bê."

	 

	'Cinî do hemverê zîhnîyetê camêrdan waran de bê'

	 

	Sereka EMEPî ya Edeneyî Sevîl Arici zî va ganî proseso ke qedexe û teda merhelaya tewr cor de yê ganî Newroze sey roja azadî bêro pîrozkerdiş û wina va: "Aşma Adare sey aşma waştişê aştî û azadî yena ziwan, pîrozkerdişê Newroze sey roja azadîye girîng o. Ma zî sey Partîya Kede beşdar benê û wazenê Newroze bi heybet derbaz bibo. Cinî do bi ruhê 8ê Adare beşdarê Newroze bibê."

	 

	'Ma do bi ruhê Arîn û Avestayan vejyê waran'

	 

	Hemseroka DBPî ya Seyhanî Berîvan Gokalpe zî wina va: "Senîn ke cinî bi ruhê Arîn û Avestayan vejyayî warê 8ê Adare, do eynî ruhê vejyê warê Newroze. Newroze xoverdayîşê Kawayê Hesinkarî hemverê Dehaqî yê. Xoverdayîşê mazluman o. Newroze awankerdişê cuwîyayîşê newe yo. Newroze vindertişê hemverê  çeteyê Efrînî yo. Ma sey DBP nika ra roşanê Newroze pîroz kenê."