'Efrîn de qirkerdiş esto destûr medê ke bibo Helepçeyo diyîn' 

2018-03-14 11:43:53


	 

	WAN - Hukmatê tirkî bi hêrişê serê Efrînî de doman û hemwelatîyê sîvîl hedef gêno. Heta nika netîceyê bombardumanê Tirkîya de xeylê xo yeyê doman û cinî û xeylê kesê sîvîlî cuya xo vinî kerdî. Hêrişê ke dewleta tirkî û komê girêdayê aye vera Efrînî dayê destpêkerdiş roja 54ine de dewam kenê. La vera nê hêrişan xoverdayîş û nêrazîbîyayîşê şarî zî dewam keno. Sîyasetmedarê Wanî ê ke reaksîyon vera hêrişê Tirkîya dayî vatî ke ê do destûr nêdê Helepçeyo diyîn.

	 

	Dimayê ke Tirkîya vera Efrînî dest bi operasyonê hewa û bejahî kerde û dima ra bombarduman û qirkerdişê ser sîvîlan zî her roje zêde beno. Şarê ke herra xo terk nêkenê, yenê kiştiş û nika zî bi qirkerdişan dir rî bi rî yê. Sîyasetmedarê cinî reaksîyon vera hêrişê Efrînî dayî û vatî ke hemverê qirkerdişan vengê aştîye berz bibo.

	 

	'Efrîn de sucê merdimayî yeno kerdiş'

	 

	Hemsereka Bajarê Wanî yê HDPî Yadîşen Karabulake zî ard ziwan ke ganî partîyê muxalefet hemverê hêrişê ser Efrînî politikayêke rast bidê meşnayîş û wina va: "Serê hêrişê Efrînî ra aşmêk ra zêde derbaz bi. Efrîn de sucê merdimayî yeno kerdiş. Merdimê sîvîl bi talûkeyêke pîl dir rî bi rî yê. Sîyasetmedarê Tirkîya bi politikayê şer rayberîya waştişê şarî nêkenê. Şarê Tirkîya aşitî, têduştî û demokrasî wazenê. Ma zî sey HDPî, ma do têkoşînê xo yê aşitî dewam bikerê. Waştişê aşitîyê de zî ma tawîz nêdanê. Efrîn de xêrcê şarê kurdan, şarê bînan ra zî merdimî estê. Ê bi tena nîyê. Ganî nê qirkerdişê ke yenê kerdiş, bêrê vindernayîş. Ma qirkerdişê ke sey Helepçe nêwazenê. Efrîn de qirkerdişêke yeno kerdiş. Cinî û domanî ver bi qirkerdişêke pîl dir rî bi rî yê. Êdi gerek reng, veng, ziwan û nijadê cîya rê tehemûl bibo. 8ê  Adare de zî waştişê cinîyan azadî bi. Cinîyan heme warê ciwîyayîşî de veng dayî dinya û vatî ke ê do vera şeran her wext vinderê û qirkerdişan qebûl nêkerê."

	 

	'Dagirkerdiş, xesp û qirkerdiş qanunan de çin yê'

	 

	Aktîvîsta TJAyî û Hemşaredara Payizavaya Wanî ke vera ci qayûm ame tayînkerdiş Yildiz Çetîne zî bale ante ser hêrişê Efrînî û va ke ê do destûr nêdê Helepçeyê diyîn û wina va: "16ê  Adare qirkerdişê Helepçe ame kerdiş. Bi nêzdîbîyayîşê serrgera Helepçe, hêrişê ser Efrînî zî dewam kenê. Ma hêvî kenê ke êdî qirkerdişê sey Helepçe nêvirazyê. Şarê Kurd êdî nêeşkeno Helepçeyê newe wedarno û qebûl bikero. Gerek şarê dinya hemverê şer û qirkerdişan bêveng nêmano. Merdimê ke yenê qetilkerdiş kam neteweyî ra benê wa bibê ma xemgîn kenê. La no prosesî de kiştiş û qetilkerdişê merdiman kêfê hîn kesan ano û wina hesibnenê ke ê serkewte bîyê. Seba aşitî û aramîya şaran ganî ma pîya têkoşîn bikerê."

	 

	'Tena hêzê aştîye eşkena şer bivindarno' 

	 

	Dayîka Aşitîye ra Alîye Balike zî wina va: "Rojhelato Mîyanîn de şer, pêrodayîş û kiştiş dewam kenê. Ma nêwazenê kiştiş virazyo. Wa şer nêvirazyo. Ma kiştişê merdimayî nêwazenê. Wexto ke kiştiş bibo, wa ma bêrê kiştiş domanê ma nê. Dinya zaf pîl a û qîmê ma hemine kena. Ma têduştî û aşitî wazenê. Ganê ke Homa daw wa Homa bigîro. Ez veng dana heme neteweyê dinya ke hemverê qirkerdişan bêveng nêmanê. Na herre qîmê ma hemine kena. Wa no şer bêro vindernayîş. Hemverê nê kiştişan çira dewletî bêveng ê. Ma têduştîyê heme şaran wazenê. Bi merdişê domanan dir merdimayî miren o.Tena hêzê aşitîye qîmê vindertişê şerî kena."