Gulseren Turan: Ma do 21ê Adare de taxan de bibî 

2018-03-13 15:11:02


	 

	Filiz Zeyrek 

	 

	EDENE  - Hemsereka HDPyî ya bajarê Edeneyî Gulseren Turane dîyar kerde ke Edene de startê pîrozkerdişê Roşanê Newroze dayî. Edene de startê Newroza 21ê Adare amey dayîş û badê kombîyayîşê çapemenî seba îfade dayîşî veng dayî Gulseren Turane. Gulseren Turane wina va: “No muamele antîdemokratîk o. Ma do 21ê Adare de taxan de bibî. Ma heqê xo yê meşru xebitnenî.” 

	 

	Program 21ê Adare Roşanê Newroze hetê komîsyono ke HDP, DBP, HDK û KCDyî ra pê yeno. Programê Newroze do 17ê Adare de dest pêbikero û 40 merkezanê cîya-cîyayan de bêro organîzekerdiş.

	 

	‘Programê Newroze’

	 

	Goreyê komîsyonî programê Newroze do wina bibo: “17ê Adare: Farqîn, Qoser, Konya, Sêrt, Kocaelî, Antalya, Çewlîg, Erdexan. 18ê Adare: Êlih, Mêrdîn, Pirsûs, Dîlok, Bursa, Dêrsim, Bidlis, Gurgum. 19ê Adare: Mûş, Colemêrg, Îdir, Semsûr, Agirî, Erxenî. 20ê Adare: Meletî, Bazîd, Manîsa, Dep, Qers, Hatay/Îskenderun, Anqara. 21ê Adare: Amed, Wan, Riha, Stenbol, Îzmîr, Edene, Mêrsîn, Nisêbîn, Cizîr, Gever.” Dîyarbîyayîşê programî ra dima seba girewtişê destûrî muracatî yenî kerdiş. 

	 

	Vizêr Edeneyî de Partîya Demokratîke ya Şaran (HDP), Partîya Herêmê Demokratîkî (DBP), Tevgerê Cinîyanê Azadan (TJA) û Meclîsê Bajarê Edeneyî yê Kongreya Demokratîke yê Şaran (HDK) seba Roşanê Newroze kombîyayîşê çapemenî viraştî û startê pîrozkerdişê Newroze dayî.  Hemsereka HDPyî ya bajarê Edeneyî Gulseren Turane kombîyayîşê çapemenî ra dima seba îfade dayîşî amey vengdayîş.

	 

	'No suc nîyo’

	 

	Gulserene reaksîyon nawit vengdayîşê emnîyetî û wina va: “Newroze roşanê şarê Rojhelato Mîyanên a. Ma her tim wayîrê roşanê Newroze vejîyenî û ma do pîroz bikerî. No suc nîyo.”

	 

	'Ma do 21ê Adarê de taxan de bibî'

	 

	Gulserenê dewamê qiseykerdişê xo de bale ante amadekarîyê Newroze ser û wina domnaye: “Newroze xeylê cayan de yena prozkerdiş. Ma do zî roja Newroze de taxan de bibî. Ma veng danê heme şaran ke wa bi herikî taxan û Newroze pîroz bikerî. Pîrozkerdişê Roşanê Newroze heqêk meşru yo.” 

	 

	'Şar do 21ê Adarê de arê bibî’

	 

	Gulserene qiseykerdişê xo yê peyênan de wina va: “Emnîyet seba heme îzehetan veng dano ma. Na rewşe, rewşêka antîdemokratîk a. Ma vera nêçîyan de têkoşîn danê meşnayîş. Cok ra ma ser de zextê pîlî yenê meşnayîş. Ma do her rojê muhîmî de îzehet bidî çapemenî û şarê xo. Ma seba 8ê Adare veng dayî û ma do 21ê Adare de zî arê bibî. Ma heme kesan dawetê pîrozkerdişê 21ê Adare Roşanê Newroze kenî.”