Dayîkê Amedî: Seba ke siba nêbo erey wirzê serê lingan 

2018-03-12 14:56:17


	 

	 Rojda Aydin

	 

	 AMED - Dayîkê Amedî hemverê hêrişê serê Efrînî reaksîyon mojnayî ra û veng dayî şarê kurd û vatî ke Efrînî rê wayîr vejyê.

	 

	 Bi 52 rojî yo ke xoverdayîşê serdemî bi heme hêzê xo dewam keno. Dayîkê Amedî reaksîyon hemverê çeteyê ke kewtê merkezê Efrînî dayî û vatî ke şarê kurd hemverê qirkerdişê ke ewro Efrîn de yeno kerdiş de bêveng nêmanê. Kesê ke hemverê nê qirkerdişan bêveng bimano hemkarê nê qirkerdişan ê.

	 

	'Efrîn de qirkerdiş yeno kerdiş'

	 

	Dayîka bi nameyê Xatun Aslane sere de çeteyê ke kewtê merkezê Efrînî şermezar kerde û va ke serwerê tirkî şerê ke Efrîn dayo destpêkerdiş şer nîyo, qirkerdiş o û wina va: "Serwerîyê tirkî qirkerdiş keno bi taybetî serê cinî û domanan de keno. Çi sucê domanan û cinîyan esto. Çeteyî domanan kenê binê sî û vanê nê terorîst ê. Kesê ke nika Efrîn de cuyenê heme kurd ê û Erdogan bi no hawa wazeno kurdan biqedêno. Semedo ke kurdî biqedîyê zî qirkerdişan keno. La serwerê tirkî se kenê wa bikerê do kurdî qetî bi qirkerdişan nêqedîyê. Ez veng dana ke sere de kurdî tu kes hemverê nê qirkerdişan bêveng nêmanê."

	 

	'Hemverê cinîyan dişmintî esto'

	 

	 Dayîka bi nameyê Yildiz Damla zî ard ziwan ke Efrîn bi rojan o hema zî xo ver dano. Yildize da zanayîş ke bi mîlyonan kurdî Efrîn de yê û nika bi qirkerdişî dir rî bi rî yê û wina va: "Heta nika bi seyan kesî cuya xo vînî kerdê û mîyanê înan de kesê ke taybetî cuya xo vinî kerdê bi taybetî zî heme cinî û doman ê. Ma tîya de reyna dişminîya îktîdarê AKPî yê hemverê cinîyan vînenê. Nika îktîdarê AKPî hewl dano ke qirkerdiş Efrîn de virazno. Hemverê nê çira dinya bêveng menda? Ewropa çira na rewşe rê veng nêvejnena û çareserîke nêvînena. A roje domana 3 aşmî amîbî qetilkerdiş. Sazgehê heqê merdiman ça de yê. Keso ke destûr bido domana hîrê aşmî do siba qirkerdiş zî bikero. Amerîqa çira çekan dana Tirkîya û DAÎŞî? bi nê çekan kurdî yenê qetilkerdiş. Ez hêrişê Tirkîya şermezar kena."