Wexto ke merdim HDPyij û cinî bo huqûq bi ca nêanê 

2018-03-12 13:32:08


	 

	Habîbe Eren

	 

	ENQERE - Parlamenterê cinîyê ê HDPî ke derheqê înan de xeylê fezleke ameyî amadekerdiş, dîyar kerdî ke wexto ke babete bena HDP huqûq bi ca nîno. Parlamentera Agirî yê HDPî Dîlan Dirayet Taşdemîre na rewşe sey ‘sîyasetê dagirkerdişî' bi name kerde û va wazenê şerê Efrînî normal bikerê û nêwazenê komel nê rastîyan bivîno.

	 

	Seba meclîsê destnêdayîşê parlamenteran bêro wedartiş, 23 fezlekeyê newe ameyî eşrawitiş. 11 fezleke derheqê parlamenterê CHP û 12 hebî zî derheqê HDPî de ameyî amadekerdiş. Hemsereka Pêroyîya HDPî Pervîn Buldane zî tede, derheqê Dîlan Dîrayet Taşdemîr, Aycan Îrmez, Feleknas Uca, Sîbel Yîgîtalp, Dîlek Ocalane de zî ame amadekerdiş. Tewr peynî derheqê parlamentera HDPî yê Wanî Bedîa Ozgokçe Ertane de zî ame amadekerdiş. Parlamentera Agirî Dîlan Dîrayet Taşdemîre û parlamentera Şirnexî Aycan Îrmeze derheqê babete de şîrove kerde.

	 

	Dîlane da zanayîş ke AKP bi di serrî derheqê sîyasetî de konseptê tasfîye meşnena û va: "Kesê hemverê nê sere wedarnenê zî yenê pelçiqnayîş.  Bi tewqîfkerdiş, tepiştiş û huqûqî de hêrişêke pîl ser komelî esto. Wextê peyînan de parlamento zî na babete de bê bandure menda.

	 

	'Nêwazenê ma bibê parlementerê şarî'

	 

	Dîlane dewam de da zanayîş ke meclîs bi talîmatê Qesre têgeyrena û wina va: "Demê peyînan de sey  parlamenter wezîfeyê muxalefet kerdê. Ma hewl danê ke şar bikerê wayîrê hîsgêrî. No wezîfeyê esas yê siyasetmedaran o. WExto ke ma fezlekeyan ewnîyenê, ma vînenê ke nêwazenê ma parlamenterîya şarî bikerê."

	 

	Dîlane dîyar kerde ke muhtewayê fezlekeyan bi vatişê ‘teror’ û ‘terorîzmî’ xemilanayê û goreyê xo çîyan nusnenê. Dîlane ard ziwan ke her vatiş û game înan sey fezleke vejêno hemverê înan û qiseykerdişê xo wina qedêna: "Rojê vîyarte de  Meclîsê hemverê HDPyijan hewldayîşê lînçî ame meydan. Nêeşkenê bi tepiştiş, fezleke û tedayan bikerê. Na rey bi şîdet kenê. No lînç û fezlekeyê AKPî sîyasetê Tirkîya bi hawayêke cidî keno rîsk. Bi teda û lînç wazenê bêveng bikerê. No qerar huqûqî nîyo. Bi talîmatê AKPî qerarê fezlekeyan yeno dayîş."

	 

	'Vatişê aştî zî suc o' 

	 

	Parlamentera HDPî yê Şirnexî Aycan Îrmeze zî reaksîyon hemverê fezlekeyan mojna ra û va: "Ma prosesêke winasî de derbaz benê vatişê ‘aştîye’ zî suc yeno hesibnayîş. Ma hem sîyaset de û hem zî hukm de çîyê ecêb vînenê. Falîyetê ma yê sîyasî sey fezleke vejênê vernîya ma. Çalakî û bernameyê parlamenteran hetê destûrê bingehîn ra yenê pawitiş. LA wexto ke babete bena parlamenterê HDPî no çî bi ca nîno. Semedo ke ma nê polîtîkayê AKPî qebûl nêkenê, bi talîmatan fezleke yenê amadekerdiş. Eke ewro dadger û dozger goreyê destûrê bingehîn têbigeyrê do tu hawa fezleke ya zî cigêrayîş amade nêbo."