Cinîya ke izxara viraznena bendeyê piştdayîşê cinîyan a

2018-03-09 13:31:28


	 

	 

	 

	Şehrîban Aslan

	 

	AMED - Cinîya bi nameyê Hedîye Barana ke ser erebokê seyar de izxara viraznena û têkoşînê ciwîyayîşî dana, dîyar kerde ke bi hewldayîşê xo heme ewnîyayîşê şiknayê.

	 

	Berê ke bi vatişê ‘karê camêrdan o' cinîyan rê yenê padayîş, yew bi yew yenê şiknayîş û înan ra yew zî cinîya ke nê ewnîyayîşan şiknaya Hedîye Baran a. Hedîye nameyê dikanê xo yê seyar kerd ‘Waya Izxarewan’ û cuya xo winî derbaz kena. Hedîya ke izxara da ser erebokî, aşmêke yo nê karî kena.

	 

	'Ez bi qerar bîya'

	 

	Hedîye da zanayîş ke vernê de seba reaksîyonê derûdorî xo anto û zehmetî anto û va: "Vatêne 'No karê camêrdan o'. Xeylê vatişê winî ameyne. La ez bi qerar bîya. Nê hukmkerdişê vernî hêrsê mi zêde kerd. Mi va 'ez do serkewte bî'. Nika ez vînena ke serkewte ya. Bi serran o mi waştêne ez bixebitîyî. Mi ke înad û mi karê xo kerd.

	 

	'Ez wazena bi cinîyan dir bixebitîyî'

	 

	Hedîye dewamê qiseykerdişê xo de dîyar kerde ke semedo ke dikanê aye çin bîyo, aye manqila xo daya ser erebokî û va ke no zî zaf zehmet o. Hedîye dîyar kerde ke waştişê aye a ya ke cayêke girewte bigîro û va aye wazena xebatkarê cinîyan bigîro verê xo û bi no hawa piştdayîş bidê yewbînan.

	 

	'Reaksîyon pozîtîf ê'

	 

	Hedîye peynî de nê çî vatî: "Bi taybetî cinî piştdayîş danê mi. Cinî wexto ke derbaz benê selam danê mi. Esnafê camêrdan zî piştdayîş dayî mi. Ez tay erey bimanî hema yenê pers kenê. Reaksîyon zaf pozîtîf ê. Ez bendeyê piştdayîşê cinîyan a."