Cinîyê karkerê ramitişî: Ma do 8ê Adare de nêrê şima bibê vengê ma 

2018-03-07 13:17:24


	 

	Fîlîz Zeyrek 

	 

	EDENE - Cinîyê karkerê ramitişî 8ê Adare de mecburê bixebitîyê. Cinîyê karkerê ramitişî mecburê ke bixebitîyê dîyar kerdî ke ê do 8ê Adare de nêrê waran zî do cinî bibê vengê înan.

	 

	Bi sehezaran cinîyê ke seba polîtîkayê şer mecbur mendî serrê herra xo ra koç bikerê, Çukurova de erdan de xebityenê. Tewr zêde keda înan yena pelçiqnayîş û bêasayîşê înan karî bibo yenê xebitnayîş. Ê nêeşkenê şêrê 8ê Adare la mesajê xo eşrawenê hemzayendanê xo rê.

	 

	Cinîya bi nameyê Lutfiye Tîmure ke seba ke sebze kom bikero serê siba rew şina hêga de xebityena. Roje de en tay 10 saetan xebityena. Lutfîye ke roje 50 TL xebityena wina vana: "Ma serê siba saete 05.00 de yenê tîya. Nîmeroj saetêke mabêne esta. Ma nêeşkenê boy bigîrê. Hamnanî germ o, zimistanî zî vartî û herre esta. Pereyê ke ma gênê qîmê şitişê cilê ma yê herrînan nêkeno."

	 

	'Ma waştêne ma serê herre xo de bibayne'

	 

	Lutfiye da zanayîş ke bi 12 serrî hêgan de xebityena û goreyê mewsîmî berardişan kom kenê û va 5 domanan zî pîl kerdê. Lutfiye bale ante ser 8ê Adare û dîyar kerde ke aye nêeşkena şêro semedo ke xebityena û va reyna vana biciwîyo 8ê Adare.

	 

	'Ma wazenê heqê kede cinîyan bêro dayîş'

	 

	Azîze Şahîne ke mecbura 6 domananê xo bido wendiş, pitike xo ya serr û nîm keye de verdena û yena xebityena. Azîze ke heme roje hişê aye serê pitike de yo vana: "Pitika mi zaf qij a. Mi wazena. La ez mecbura bixebitîyî ke înan rê biewnî. Zerrîya mi bi pitika mi veşena. La çîyê ke ez bikerî çin o." Azîze ard ziwan ke bi 10 serrî yo û va: "Ma bi serran o verê Êlih ra koçê tîya kerd. A roje ra ez xebityena. Mi waşt ke ez serrê herra xo de bî. 8ê Adare de waştişê mi o yo ke cinî azad bê û şîdetê serê înan biqedîyo. Ez wazena beramberê keda xo bigîrî."

	 

	'Ma rojêke zî seba derdê xo vajê nêşêrê waran'

	 

	Leyla Tîmura 30 serrî yo karkera ramitişî û verê 20 serran mêrdeyê aye cuya xo vinî kerde bi tena serê xo 6 domanê xo ewnîyawa. Leyla ard ziwan ke pereyê gêna qîmî aye nêkeno û va: "Sey şima vînenê heta şan de mîyanê herre de yê. Sewbînî  şansê ma çin o. Xeylê nêweşîyê mi estê. Pêwa nêweşîyanê xo xebityena. Ma 50 TL gênê. No zî qîmê fatureyê awe û ceyranî nêkeno. Seba heme çî zam ame la seba kedkaran çin o. Rojêke zî seba ke ma halê xo vajê ma nêşî waran. Wa 8ê Adare heme cinîyan rê pîroz bo."

	 

	Emîne Şahîna 19 serrî zî seba şert û mercan nêşîya mektebe û va: "Xeyala mi mamostetî bi. La mi çar serrî ya xo de fek mekteba ra verada. Maya mi xebityena û mi zî wayê û birayê xo pîl kerd. Ê pîl bî ez ameya heta nika hêgan de xebityaya. Ez 8ê Adare heme cinîyan pîroz kena. Ez zî wazena cinî hemverê îstîsmarê domanan û şîdetê serê cinîyan vengê berztir bikerê."