Bi hezaran cinîyan verê xo dayî Efrîn 

2018-03-06 14:16:38


	 

	Berçem Cûdî- Ilham Eloso

	 

	KOBANÊ - Cinîyê her çar parçeyê Kurdistanî, Lubnan û Vakurê Sûrîye bi amancê piştdayîşê Xoverdayîşê Serdemê yê Efrînî û pîrozkerdişê 8ê Adare verê xo dayî mintiqaya Efrînî.

	 

	Cinîyê her çar parçeyê Kurdistanî, Lubnan û Vakurê Sûrîye bi amancê piştdayîşê Xoverdayîşê Serdemê yê Efrînî û pîrozkerdişê 8ê Adare verê xo dayî mintiqaya Efrînî. Bi hezaran cinî vizîr mintiqaya Cizîre, Şengal, Mexmûr, Başûrê Kurdistanî, Rojhelat û Vakurê Kurdistanî û  Lubnan de seatê şanî de resayî Kantonê Kobanî. Cinîyê ke ameyî Koban serê siba bi cinîyê Mintiqaya Firatî dir bî yew û amancê piştdayîşê Xoverdayîşê Serdemî û pîrozkerdişê 8ê Adare Roja Cinîyanê Kedkaranê Dinya verê xo dayî mintiqaya Efrînî. Têkilîyê babete cinîyê ke nê karwanî de cayê xo gênê hîs û mesajê xo ardî ziwan.

	 

	Cinîya bi nameyê Hebîba Ehmede ke bajarê Çilaxa yê Mintiqaya Cizîre wina va: "Ma nika verê xo danê Efrîn. Seba Efrîn ganê ma feda yo. Seba Efrînî ez do ganê xo feda bikerî, no reya peyîn nîyo û ne reya yewin o ke ma verê xo danê Efrîn. Verê ma do tim Efrîn de bo. Ma do heyfê gonîya şarê xo bigîrê."

	 

	'Cinîyê Êzidî pişta cinîyê Efrînî de yê'

	 

	Cinîya Êzidî ya Şengalî Enam Weylese xoverdayîşê Efrînî selam kerde û wina va: "Sey cinîyê Ezidî waştişê ma a ya ke bi ruhê Avesta û Barînan 8ê Adare Efrîna rengîn û xoverdayox de pîroz bikerê. Vengdayîşê mi pêroyîrê cinîyan rê esto ke heme zerrîya xo bikerê yew û hemverê nê qirkerdişan reaksîyon bimojnê ra. Semedo ke netîceyê nê hêrişan de cinî û domanî yenê qetilkerdiş."

	 

	'Serkewtişê Efrînî, serkewtişê şorişê cinîyan o'

	 

	Heto bîn ra Kantonê Kobanî ra Felek Yûsife zî bêvengîya dewlet û sazgehê heqê merdiman yê hemverê hêrişê serê Efrînî şermezar kerde û wina va: "Ma sey cinîyê Kongra Star yew k ji rêzeçalakîyê ma a bi ke ma kîşte cinîyê Efrînî 8ê Adare pîroz bikerê. Semedê nê zî cinîyê her çar parçeyê Kurdistanî, Şengal, Mexmûr, Lubnanî û temamê Vakurê Sûrîye kom bîyê ke amanc bi ca bîyarê. No semed ra senîn ke şorişê Rojawanî bi rayberîya cinîyan dest pêkerd, do ewro Efrîn de zî şorişê Rojawanî rayberîya cinî ser biko."