Cinîyê Edene: Seba cinîyê Efrînî vejyê meydanan 

2018-03-05 15:05:13


	 

	Fîlîz Zeyrek

	 

	EDENE - Cinîyê seba Platformê Cinîyan ê Edene, rêxistinbîyayîşê ked û meslek û partîyê sîyasî seba 8ê Adare veng dayî û wina vatî: "Hemverê kiştişê cinîyan, îstîsmarê domanan, şîdet û şer, seba cinîyê Efrînî vejyê meydanan."

	 

	Amadekarîyê 8ê Adare Roja Cinîyanê Kedkaranê Dinya bi çalakî û bernameyê xo dewam kenê. 8ê Adare de Platformê Cinîyê Edene, rêxistinê meslekî û kede, cinîyê partîyê sîyasî do Meydanê Ugur Mumcu bêrê têhet û ver bi Parkê Ataturkî de rayşîyayîşêke bikerê.

	 

	Sereka Egîtîm Senê Edeneyî Seçîl Sonmeze da zanayîş ke wexto 8ê Adare yeno vatiş, têkoşînê cinîyan yeno hişê merdimî û wina va: "Cinîyan bi zor warê xebate ra dûr fînenê. Bi OHAL û KHKyan kerdî binê tedayan. Cinîyan karê înan ra kenê. Hepsê keyeyî kenê. Merdiş, şîdet û îstîsmar her ke şino zêde beno. No polîtîka hetê AKPî ra seba bîyayîşê xo bipawo yeno kerdiş. Ma do 8ê Adare de waran de bê. Ma do hemverê ferzkerdişan waran de bê."

	 

	'Seba cinîyê Rojawanî xo ver bidê'

	 

	Îdareyê HDPî yê Edene Suzan Kiliçe zî bale ante ser hêrişê hemverê Efrînî û dîyar kerde ke cinî Efrîn de hemverê zulmî xo ver danê û ê zî tîya de hêz bidê cinîyê Efrînî û va seba cuyake azad wa heme cinî vejyê waran.

	 

	Sekretera Ekonomîya Egîtîm Senî Seher Kiliça ke wezîfeyê xo ra amî îxrackerdiş ard ziwan ke hemverê OHALî ganî emsar bi hawayêke xurt beşdarê 8ê Adare bibê û va gerek her cinîyê ke yenê qetilkerdiş do 8ê Adare de waran de cayê xo bigrê, vengê xo berz bikerê. Sehere peynî de ard ziwan ke ê wayîrê hêzê ke heme probleman çareser bikerê.

	 

	Platformê Cinîyan ê Edenî ra Derya Çîçeke zî da zanayîş ke gerek ma hemverê şerî vejyê meydanan û dîyar kerde ke do heme cinî 8ê Adare de hemverê hêrişan xo ver bidê.