Wa cinî 8ê Adare de vejyê meydanan û azadî biqîrê 

2018-03-05 14:15:55


	 

	Rojda Aydin

	 

	AMED - Endama Dîvana Hemsereka KCDî Mekiye Guzele 8ê Adare Roja Cinîyanê Kedkaranê Dinya pîroz kerde û ard ziwan ke tedayê serê cinîyan nêeşkenê xêze înan ê têkoşînê bişiknê.

	 

	Endama Dîvana Hemsereka Kongra Komeleyê Demokratîk (KCD) Mekiye Guzele 8ê Adare Roja Cinîyanê Kedkaranê Dinya pîroz kerde û va welatê ke qedexe û hêrîş tede estbê heqê cinîyan, demokrasî û azadî ra bêpar o. Mekiye ard ziwan ke tedayê ser cinîyan nêeşkenê hêzê têkoşînî yê cinîyan bişiknê.

	 

	Mekîye va ke 8ê Adare emsar hemverê hêrişê ke ser cinîyan de virazyenê do bibo munayîşê têkoşînê tarîxî û wina va: "Ma do roja 8ê Adare de bi coş û kelecanêke pîl warê mitîngî de bê. Lazim o merdim serrê 2016-2017an de ke çi cuyayê biewno. Bi di serrî cografya Kurdistanî hemverê destkewtişê cinîyan hêriş yenê kerdiş. Bi taybetî zî serra 2016 de dimayê ke qayûm tayînê şaredarîyê BDPe ame kerdiş de sîstemê hemserekî zî ame çinkerdiş. Semedo ke sîstemê hemserekî dinya rê nimûne bi. Sere de hêrişê ci ame kerdiş. Seba sîstemê hemserekî de têduştîya cinî û camêrdan estbî."

	 

	'Zîhnîyetê camêrdan hêrişê merkezê cinîyan kerd'

	 

	Mekîye dewamê qisyekerdişê xo de va ke destkewtişê cinîyan rê hêriş ame kerdiş. Labelê cinîyan hemmverê hêrişî sere nêtewênayî û wina va: "Ganî cinî qetî fek xoverdayîşê xo ra vera nêdê. Merkezê cinîyan dimayê ke qayûm dest bi xebatê xo kerd bi zihnîyetê xo yê camêrdî ray beno. Qayûmo ke xeylê merkezê cinîyan pada, yê mendî zî camêrdan bi ca kerdî. No semed ra zî zîhnîyetê camêrdî merkezê cinîyan de ewro serdest o. Ewro tewr zêde cinî bi hawayêke sîstematîk rastê tacîz, îstîsmar yenê û tewr zêde cinî yenê kiştiş."

	 

	'Ma qedexeyê hemmverê 8ê Adare nas nêkenê'

	 

	Mekîye qiseykerdişê xo wina dewam kerde: "Hêrişê ke hemverê serkewtişê cinîyan dest pêkerdo gerek ma 8ê Adare de açarnê têkoşîn. Ma qedexeyê ke hemverê 8ê Adare de yenê kerdiş nasnêkenê û ma cinîyan bi vindertişê xo baş mojna. No semed ra zî Sêrt, Mêrdîn, Êlih, Amed û xeylê bajarê bîn ma do bi bernameyê xo û hemverê zîhnîyetê ke wazeno cinîyan keye de heps bikero kuçeyan de bê."

	 

	'Teda nêeşkenê hêzê ma bişiknê'

	 

	Mekîye peynîya qiseykerdişê xo de va ke cinî hemverê heme astengan do fikrê xo û ruhê xo yê têkoşîn bikerê qîrnayîşê azadî û wina va: "Heme dinya de 8ê Adare bi coşike pîl yena pîrozkerdiş. Labelê Tirkîya de vilakerdişê vilê qerenfîlan zî a roje de qedexe yo. Welatê ke qedexe û hêrîş tede estbo heqê cinîyan, demokrasî û azadî ra bêpar o. La tedayê serê cinîyan nêeşkeno hêzê ma yê têkoşînî bişikno. Ma veng danê heme cinîyan ke vejyê waran û azadî biqîrê."