'Do nêeşkê bi hêrişanê xo îradeyê ma bişiknê' 

2018-03-05 12:23:25


	 

	Lîlav Elî-Ferîde Zede

	 

	EFRÎN - Koçberê kampê Rubarî hêrişê dewleta tirkî yê vera Efrînî şermizar kerdî û wina vatî: “Herêma Efrînî cayê asanî û seyyewbînanîya şaran a. Ma koçberê Efrînî yî, labelê dewleta tirkî ya dagirker destûr nêdana ke ma asanî bicuyî.”

	 

	Dewleta tirk û bi desan rêxistinê çeteyan 45 rojî yo ke bi tanq, top, teyara û sîlehanê teknolojîkan hewl danî Efrînî dagîr bikerî. Vera înan de şerwanê YPG û YPJyî xoverdayîşêko tarîxî nîşan danî. Koçberê ke pêroyê Surîye ra hêrişê rejîm û komê çeteyan ver koçê herêma Efrînî kerdî, kampê Rubarî yê herêma Efrînî de bi ca bîyî û reya diyîn raştê hêrişanê dewleta tirk û çeteyanê girêdayeyê ci ameyî.

	 

	Babete ser o koçberê ke vera hêrişanê dewleta tirk û çeteyanê girêdayeyê ci ver koçê herêma Efrînî kerdî, qisey kerdî.

	 

	Koçbera bi nameyê Emîne Ehmede qiseykerdişê xo de wina va: "Kampê koçberan daxî hêrişanê dewleta tirk û OSOyî ra para xogirewtî. Rêxistinê Heqê Merdiman bêveng manenî. Her çiqas ke hêriş bibî zî xoverdau-yîşê şarê kurdî dewam keno.”

	 

	'Ya serkewtiş ya serkewtiş'

	 

	Koçbera bi nameyê Neda El-Ehmede wiha va: "Şarê Surîye û kurdî bi felsefeya Rayber Apoyî perwerde bîyî. Tu kes tanq, top, teyara û sîlehanê teknolojîkan yê dewleta tirkî ra nêterseno. Ya serkewtiş ya serkewtiş.”

	 

	'Nêeşkenî îradeyê ma bişiknî’

	 

	Tewr peynî Îdarekara Kampê Rubarî Suzan Osoye qisey kerde û wina va: “Destpêkê hêrişanê dewleta tirkî ra nata Kampê Rubarî yeno hedefkerdiş. Erdogan baş zano ke Kampê Rubarî tena yê koçberan o. Seba ke şervanê YPG û YPJyî Efrînî pawenî û ruhê xo seba erdê xo feda kenî, dewleta tirkî hêrişê înan kena. Dewleta tirkî qetlîaman virazena û sîvîlan qetil kena. Xoverdayîşê Seserre do heta qezencî dewam bikera. Erdogan bi hêrişan nêeşkeno îradeyê ma bişikno.”