‘Hewl danî ke tewrê hemwelatîyan Lîmontepe veng bikerî’ 

2018-02-24 11:38:30


	 

	Melîke Aydin

	 

	ÎZMÎR - Endama Meclisê Îdarekarê Lîmontepe Zeynep Gokçeye dîyar kerde ke taxa înan bi projeyan rantî rê ameya akerdiş û wina dewam kerde: “Cayê ke soz day ma ç in o. Heme çî ma ra yeno nimitiş. Ma nêwazenî ke bêxebera ma çîyêk bêra kerdiş.”

	 

	Çarçeweya projeyê bedilnayîşê (vûrnayiş) şaristanî de qezaya Karabaglar, taxa Cennetçeşme û Lîmontepeyî yê Îzmîrî zî tede 16 taxî de proje dewre de yî. Her çiqas ke reaksîyon bêrî nawitiş û şar derheqê babete de doze biakerî zî proje ra gamêk apey nîno eştiş. Qerarê projeyê bedilnayîşê (vûrnayiş) şaristanî 6 serrî verê cu ameybî dayiş. Babete ser o Endama Meclisê Komeleya Lîmontepe Zeynep Gokçeye qisey kerde.

	 

	Zeynebe ke hemwelatîya tewr kehen ya taxa Lîmontepeyî ya destpêkê qiseykerdişê xo de wina va : “Badê derbeya 1980î hûmara nufusê taxe zêde bîye. Taxa ma seba ke nizdîyê merkez, otoban, teyaregeh û deryayî ya, bala şîrketê înşaatan ancena. Ma bedilnayişê bajarê xo nêwazenî. Ganî heme çî goreyê heq û huqûqî bêrî kerdiş.”

	 

	‘Ma do heta peynî têkoşîn bidî’

	 

	Zeynepe dewamê qiseykerdişê xo de va ‘îradeya şar çin yena hesibnayiş’ û wina dewam kerde: “Şîrketî plananê xo ma ser de ferz kenî û her reye zî rastê reaksîyonan yenî. Badê reaksîyonan gamêk apey erzenî û dima ra reyde planê xo kenî dewre. Heta nika 4 planê Mudirîya Şaristanî û Dorme ameyî redkerdiş. Seba ke cewab nêdîyeno persanê ma, ma 2012î de doze akerd.ma do heta peynî têkoşîn bidî.”

	 

	‘Hewl danî ke veng bikerî’

	 

	Zeynepe qiseykerdişê xo yê peyênan de wina va: “Lîmontepe sey ‘qada rîsk’ amey îlankerdiş. Labelê reyna zî xebat dewam kenî. Hewl danî ke veng bikerî.