Esra Arsan: Çapemînya hetgirewte şîdet kûr kena 

2018-02-20 12:49:47


	 

	STENBOL - Prof. Dr. Esra Arsane dîyar kerde weşanê goreyê vatişê îqtîdarî, xeberê ke virazenê û şîdet rê xizmet kenê estê û va komel nê ruhî nêweşî ke çapemenî tede ya, ancax bi ziwanê aştî eşkena vejîyo.

	 

	Prof Dr. Esra Arsane derheqê ziwanê çapemenîya Tirkîya wextê peyîn xebitnena de şîrove kerde û dîyar kerde ke ziwanê ke çapemenî xebitnena ‘ziwanê şîdetî yo’ û rewşa ke komel ardê zî ‘nêweşîya no ruhî yo'. Esra ard ziwan ke seba rewşa normal virazyo gerek ziwanê aştî bêro awankerdiş. Esra wina dewam kerde: "Şehîdbîyayîş, gazîbîyayîş, seba welat cuya xo fedakerdiş, vera merdişî têkoşîn, heskerdoxê xo verda, bêteredut şîyayîşê ver bi mergî. Nê nimûneyî heme destpêkê dagirkerdişê Efrîn de ma vînenê. Yê ke şer de cuya xo vinî kerdê leşkerê ciwan yê ‘bêters’, ‘ruhê ke vinî nêkenê' yê. Ê ke înan kişenê zî ‘kalleş ê’. La gelo no şer çira esto? No şer hewce keno? Heqdar ê? Hewcebi nê ciwanî bimrê? Mixabin cewabê nê persan çin o."

	 

	Esra dewamê qiseykerdişê xo de bale ant ser xebatkarê çapemenî û wina va: “Xebatkarê çapemenîye ke cuya înan tehluke de nîyo, ofîsê xo yê Enqere, Stenbol de manşetê ke merdiş û şîdet pîroz kenê erzenê. Bêguman na merhaleya çapemenîye de pare îqtîdarî zî zaf esta. Manşetê rojnameyan goreyê selahîyetdarê fermî yenê eştiş."

	 

	'Ziwanê çapemenîye ra her di wextan biewnê'

	 

	Esra da va çapemenîyêke xoser eşkena çareserîya pêrodayîşan de rolêke bi bandure kay bikero û va: "Tirkîya wextêke kilm rojê çareserî û aştîye dî. O wext ziwanê çapemenî ra biewnê aktoran senîn danê şinasnayîş. Senîn qalê aştî û têduştî kenê. Senîn qalê rojê weş kenê. Wexto ke merdim her di wextan ewnîyeno, cîyayî bi hawayêke zelal vîneno. Eynî çapemenî, eynî xebatkar, la ewro ziwanê şerî xebitnenê."

	 

	'Yê pesnê aştî kenê ceza danê'

	 

	Esra ard ziwan ke komelî de dişminîyê hemverê kurdan û bêtêduştî berz bîyê û va na rewşe zaf xeter a û wina va: "Bi taybet çapemenîya komelî de ziwanê nefretî yê şîdetî zêde kenê û pîrozkerdişê şerî zêde bîyo. Kesê ke pesnê aştî û çareserî kenê zî yenê cezakerdiş."

	 

	Esra qiseykerdişê xo wina qedêna: "Vernê de ganî îqtîdar waştişê aştî de samîmî bo. Gerek çapemenî binê destê îqtîdarî ra vejîyo. Gerek vajo ke şer kesî rê çîyêk nêano. Gerek ziwanê xeberan ê heqîqet geyreno awan bikerê. Weşanê goreyê vatişê îqtîdarî xeberan viraznenê û şîdet rê xizmet kenê. Komel zî bi nê ruhê nêweşî yê bi çapemenîye dir tede yê, ancax bi ziwanê aştî eşkenê vejîyê.