Semsûr de 5 dewê Kurdê Elewîyan do binê awe de bimanê 

2018-02-18 14:20:53


	 

	Gulîstan Azak

	 

	SEMSUR - Awbendê Koçalî yê viraştişê ey dewam keno do 5 dewê Elewî binê awe de verdo. Hemwelatîyan derheqê babete de vatî ke: "Waştêne ma Kurd û Elewîyan bi madenî yê dewe de awankerdê bikşê. La bi ser nêkewtî. Nika zî wazenê ma bi awbend bikşê."

	 

	Awbendê Koçalî yê ke 40 km Semsur ra dûrî yo û viraştişê ey dewam keno, do dewê Elewiyan ê sey Çatalagaç, Doganli, Gokçay, Baglica û Agaçkonakî binê awe de verdo. Viraştişê awbendî 2014an heta nika dewam keno, dewijî bi îzahatê çapemenî û çalakîyê hemverê nê vejênê.

	 

	Cinîya bi nameyê Zeynep Ergula 56 serrî wina va: "Ma bi citkatî û ramitişê titûnî debara xo kenê. La emsar qedexe ardî seba titûnî. No semed ra ma betal mendî. Bi taybet awbendî dewê Elewîyan de viraznenê. No zî adetê dewlete yo."

	 

	'Kêna mi sebebê tedayê dewlete beşdarê PKKî bî'

	 

	Zeynebe dewam de wina va: "Serrê 1980ê de leşkeran eşt serê dewe. Ma o wext rîyê dewlete rast dî. Ma rastê îşkenceyê pîl ameyî. Vatêne 'Şima Kurd ê, Elewî yê’ û bi copan îşkence cinî, camêrd, domanan, kal û pîran kerdêne. Kêna mi sebebê tedayê dewlete beşdarê PKKî bî. Hema zî dewa ma de hetê dewlete ra cîya yena vînayîş û ma yenê tehdîtkerdiş."

	 

	'Hemverê merde û turbanê ma hurmetê înan çin o'

	 

	Cinîya bi nameyê Fatma Esena 54 serrî zî ard ziwan ke awbendo ke yeno viraştiş de do heme goristan û turbeyê Elewîyan binê awe de bimanê û wina va: "Dewijî hemverê celadê hurmetê înan merdan çin o, têkoşîn kenê. La çi feyde...Dewlete hemverê dewêke şer dayo destpêkerdiş. Verê zî bi maden waştî ke şarê Kurd bikşê, la nika bi awbend wazenê bikşê. Vanê 'tîya ra şêrê'. Ma do şêrê ça? Ma citkar ê. Ma şêrê bajar ma do senîn bicuyê? Serekkomar wazeno ke ma gane terkê merdişî bikero."

	 

	Turkan Yoldaş (47) da zanayîş ke dewe de nufuse ciwan û betalan xeylê zêde ya û kesê ke dewe terk kenê bajaran de keyeyê TOKÎ de reyna pereyê înan danê, pêşnîyar kenê. Ayşe Yoldaşa 90 serrî zî dîyar kerde ke wazenê dewijan bi vêşanî terbîye bikerê û va wa bi nanê dewijan kay nêkerê û dest bi nê caardişan vera bidê.