Hem xebityêna hem zî cinîyan rê warê ekonomî akena 

2018-02-14 12:36:12


	 

	Zeynep Durgut 

	 

	WAN - Taxa Xacortî de cinîya bi nameyê Perîşan Sayginyigite bi xebata xo hem debara xo kena û hem zî cinîyan rê warê ekonomî akena.

	 

	Taxa Xaçortî yê girêdayê qezaya Armûşî de cinîya bi nameyê Perîşan Sayginyigite (62) 8 serrî yo bi keda destê xo debara xo kena. Maya Perîşane her çîyê ke bi destê xo viraznena  lîfan ra heta lîhêfan dikanê xo de roşena. Eynî wextî de seba ke hetê ekonomî de cinîyê taxe rê bena hetkar, cinîyan rê zî warê ekonomî akena.

	 

	Hewl da û serkewte bî

	  

	Perîşane ard ziwan ke seba cinî warê ekonomî de xo aver berê, a her hawa de cinîyan rê bena destek û wina va: "Ez Colemêrg ra ya. Mi Colemêrg de serê herra xo de berardiş kerdêne. La dimayê ke ez zewîcyawa, ez bîya êdî wayîrê domanan û ez girêdayê keyeyî menda. La hemverê zehmetîyan qetî mi fek cuyayîş ra vera nêda. Seba ke ekonomîya xo awan bikerê, ez her wext fikrîyena. Her çiqas emrê mi girs bibo zî mi qetî fek zanayîş ra vera nêda. HEmverê zanayîşî meraqêke û hewldayîşê mi bi. Mi dest bi wendiş û nuştişî kerd û serkewte bîya. Dima ra mi qerar da ke ez seba xo kargehêke akerî. Her warê cuyayîşî de cinî seba ke ekonomîya xo awan bikerê hewl danê û ekonomî de ca gênê."

	 

	'Ganî warê ekonomî de cinî xo ver bidê'

	 

	Perîşane bale ant serê zîhnîyetê camêrdan û ard ziwan ke cinî zîhnîyetê camêrdan seba xo astengî vînenê û wina va: "Seba ke komelan de zîhnîyeto serdest ameyo awankerdiş, cinî warê averşîyayîşî de zehmetî ancenê. La cinî eşkenê heme çî bikerê. Ganî cinî fek keda xo ra vera nêdê. Bi zêdebîyayîşê kerdişan kar zî zêde bi. Nika 6 cinîyê karker verê mi de xebityenê. Mi her cinîyêke musna no karî. Nika her cinî karêke kena. HEm pere qezenc kenê, hem zî warê komelbîyayîş de serkewtişî pîl konê destê înan. kargehê mi de lîf, destmal, lihêf û her çîyêke ma dest viraznenê. Karê ma baş derbaz beno. Wa qetî cinî bêhêvî nêmanê. Eke cinî ekonomî de aver şêro, eşkena her karî bikero û hetê karî de serkewte bibo. Gerek warê ekonomî de cinî xo ver dbidê."

	 

	'Bi OHALî dir karê ma vindert'

	 

	Perîşane bale ante OHALî ser û va ke eke OHAL wirzo do ekonomî de qet problem nêmanê û wina va: "Seba vayîye malzemeyan ma reyan nêeşkenê pereyê xo vejê. Ekonomî ra zêde, ez seba ke çend cinîyan warê ekonomî de aver berî aye fikrîyena. Bi OHALî dir karê ma vindert. Ez wazena OHAL bêro wedartiş. Her cinîyêke eşkena ekonomîya xo aver bero. Çiqas destê cinîyan ra bêro gerek bikerê."