'Hêriş hemverê perspektîfê neteweya demokratîk ê Birêz Ocalanî yo' 

2018-02-14 11:54:18


	 

	 

	Berîtan Canozer 

	 

	STENBOL - Sereka Koma Meclîsê Partîya Çepî ê Hamburgî Cansu Ozdemîre dîyar kerde ke hêrişê hemverê Efrînî raste rast bi tecrîdê serê Rayberê PKKî Abdullah Ocalanî dir girêdayeyo û wina va: "Hêriş hemverê perspektîfê neteweya demokratîk ê Birêz Ocalanî yo.” 

	 

	Hêrişê Tirkîya ê hemverê Efrînî roja 25in de dewam keno. Hêrişan de xeylê sîvîlî cuya xo vinî kerdî û bi seyan sîvîlî zî birîndar bî. Hêzê mîyanneteweyî qetilkerdişê sîvîlan qebûl kenê û tena bi şermezarkerdişî dir sînor maneno. Sereka Koma Meclîsê Partîya Çepî ê Hamburgî Cansu Ozdemîre hêrişê vera Efrînî, proseso ke yeno cuyayîş, polîtîkayê Tirkîya yê serê Kurdan û têkilîyê înan bi Rûsya şîrove kerde.

	 

	‘Hêriş girêdayê tecrîdî yê'

	 

	Cansu va ke hêrişê hemverê Efrînî girêdayê tecrîdê serê Rayberê PKKî Abdullah Ocalanî yê û wina va: "Awankerdoxê şorişê Rojawanî Rayberê Şarê Kurd Birêz Ocalan o. Hêrişê vera Efrînî, vera xete  netewaya demokratîk yê Birêz Ocalan wazeno Rojhelato Mîyanên de aver bero yo. Hêriş vera perspektîfê netewaya demokratîk ê Birêz Ocalanî yo.”

	 

	'Ocalan, xelisnayîşê heme şaran o'

	 

	 Cansu ard ziwan ke şarê ke Kurdistan de cuyenê, hepsîyê ke hepisxaneyan de yê û heme kesê Rojhelato Mîyanên de cuyenê, prosesê şerî ra bi bandure benê û wina va: "5ê Nîsana 2015an ra heta nika Tirkiya de kaos û şer kûr beno. Merdimî mirenê, yenê qetilkerdiş. Wazenê Birêz Ocalanî bêveng verdê. Îzole kenê. Dewleta Tirkî zana ke Birêz Ocalan seba şaran xelisnayîş o. No semed ra na polîtîka taybet bi ca anê."

	 

	'Huqûqo mîyanneteweyî yeno binpêkerdiş'

	  

	Cansu dewam de wina va: "Di hewteyo Artêşa Tirkî û komê îşlamî vera şarê sîvîl qirkerdiş kenê. Ewro Efrîn de vera merdiman bi teyare û çekê kîmyewî hêriş kenê. Dewleta Tirkî xeyal kerdêne ke hîrê rojan de biko Efrîn û la dî ke nêeşkena na rey zî hêriş vera sîvîlan giran kena. Dewleta Tirkî vera heme çimê dinya de qanûnê mîyanneteweyî îhlal kena."  

	‘Rusya seba berjewendîyan sîyaset kena'

	 

	Cansu derheqê têkilîyê Tirkîya, DYA û Rusya de zî şîrove kerde û va: "Prosesê Kobanî de ma Rûsya dir pêvînayîşêke kerde. Ma bi dîplomatê înan dir pêvînayîş kerd. Vatibî 'ê nêzanê siba Putîn do se bikero, ma nêzanê ma çi dir do bêrê rî bi rî, ma nêzanê kam peymanê bazirganî bikoyê vernîye ma.' Yanî Rûsya goreyê berjewendîyê xo yê rojane sîyaset kena. Rejîmê Esadî seba Rûsya girîng nîya. Rûsya nûktayêke ferz kena a zî yewbîyayîşê Sûrîye ya. Rûsya piştdayîş dana dewleta Tirkî nêzana rayîr çi rê akena. Bi kaos Rûsya nêeşkena çîyêke bidest bikero. Verpayê ci do vinî bikera. Rûsya hewl dana Tirkîya bixebitno, rejîmê Rûsya awan bikero û bibo hêz."

	 

	'Hemverê merdimayî suc kena'

	 

	Cansuye ard vîr ke Konseya Asayîşê Neteweyê Yewbîyaye, ser waştişê Fransa kom bîya û hêrişê Tirkîya vera Efrînî şîrove kerdê la şermerzarkerdişêke û ne zî seba peynîkerdişê hêrişan çîyêk nêkerda. Cansu ard ziwan ke Tirkîya verê çimê heme dinya de vera merdimayî suc kena. Cansu peymanê tankan ê Elmanya bi Tirkîya dir kerd û xira kerd zî şîrove kerde û va: "Tanqê ‘Leopard-II’ yê Elmanya 2006-2009an rotibî Tirkîya û hêrişê vera Efrînî de ameyî xebitnayîş. No semed ra Elmanya reaksîyonê pîl mojna ra. Elmanya seba di sebeban mecbur mende game peyser bierzo."

	 

	'Şarê Ewropa vanê ke îxanet Kurdan rê yeno kerdiş'

	 

	Cansu bêvengîya Ewropa de yena cuyayîş rexne kerde û va: "Her wext derheqê Kurdan de na rewşe yena cuyayîş. Prosesê bigonî û qirkerdişan de tu welatêke Ewropa reaksîyon nêmojnenê ra. Derheqê qetilkerdişê sîvîlê Efrînî de xeylê belge seba hukmatê Elmanya ame pêşkêşkerdiş. Vanê ke ê zelal nêkenê ke bi tanqê înan hêriş ameyê kerdiş. Şarê Ewropa nê çîyan sey îxanetê vera Kurdan gênê dest."

	 

	Cansu dewamê qiseykerdişê xo de bale ante ser têkoşînê cinîyan ê Efrînî û da zanayîş ke rayberîya xoverdayîşî bi taybet cinîyê Kurd û şarê Kurd kenê. Cansu wina dewam kerde: "Pêwa heme piştdayîşê Tayyîp Erdoganî, DAIŞî derbeyê girsî girewt û vinî kerd. Erdogan Rojhelato Mîyanên de wayîrê hêzêke nîyo û o zî zano. Zano ke sîyaseto teberî de ameyo îzolekerdiş. Her ke kono zor zî dewaya faşîzmî zêde keno. AKP û MHP do Efrîn de serkewte nêbê. Çapemenî de vanê ê nêzdîyê serkewtişî yê. La her kes zano ke Efrîn de aver nêşîyê."

	 

	Cansu qiseykerdişê xo winî qedêna: "Kurdan Rojawan de pêwa heme hêrişan rayîrêke hîrên xêz kerdî. Ma bî şahidê xoverdayîşêke pîl. Tu dewletêke Rojhelato Mîyanên de modelê îdareyê mintiqa û îdareyo xoser nêkerdibî, kurdan îfade kerd ke Rojhelato Mîyanên de cuyake hempar awan kenê. Nika Rojawan de awankerdişê modelê îdareyo xoser esto û hêzê hegemon zî nê ra tersenê."