'Do xoverdayîşê Efrînî serkewte bo' 

2018-02-12 12:35:01


	 

	Ronîda Hacî  

	 

	TIL TEMIR - Endama Îdarekara Hêzê Natorî yê Til Temirî Sîlda Şemûne hêrişê dewleta Tirkî ê serê Efrînî şermezar kerde û va: "Do xoverdayîşê Efrînî serkewte bo û îqtîdar do vinî bikero."

	 

	Hêrişê dewleta tirkî yê serê Efrînî dewam kenê. Têkildarê hêrişê serê Efrînî Endama Îdarekara Hêzê Natorî yê Til Temirî Sîlda Şemûne ard ziwan ke ê do hemverê îqtîdarî sere nêtewênê û wayîrê deskewteyê xo vejîyê.

	 

	Sîlda Şemûne dîyar kerd ke bi yewitî û îradeyê şarê mintiqa ê do xoverdayîşê Efrînî serkewte bo û wina va: "Ma hêrişê serê Efrînî bi şîdet şermezar kenê. Xoverdayîşê şerwanê QSD, YPG û YPJe selma kenê û ma şarê Efrînî ra vanê ma piştîya şima de yê. Senîn Şengal, Reqa, Kobanê ma serkewte bî, ma do mintiqaya Efrînî de zî serkewte bê."

	 

	'Serkewtiş do şarê Efrînî bo'

	 

	Sîlda qiseykerdişê xo wina dewam kerde: "Tirkîya hemverê heme rayîr û metodê seba çareserkerdişê alozîyê Sûrîya bîya astengê tewr pîl. Şarê Efrînî zêdeyê nîm mîlyon koçberê mintiqaya Sûrîye ameyê wayîr vejênê la bi hawayêke zî hetê Tirkiya ra yenê bombardumankerdiş. La ma zanê ke şarê Efrînî hemverê nê polîtîqayê lêşin vinî nêkenê û serkewtiş do şarê Efrînî bo."

	 

	'Ma do Efrîn bipawê'

	 

	Sîlda tewr peynî wina va: "Ma sey cinîyê Hêzê Natorî amadeyê ke ma verê xo bidê Efrînî û hemverê dagirkerdişê Tirkîya vinderê û şarê xo bipawê. Ma hêvîyê xo vinî nêkenê û ma do Efrîn bipawê. Bicuyo xoverdayîşê Efrînî."