17 serrî yo bi xebatêke hempar debara xo kenê 

2018-02-10 13:18:46


	 

	Zeynep Durgut

	 

	WAN - Wan de maya Ferînaz  û mêrdeyê aye bi kedêke pîl bi viraştişê secadeyan xebatêke hempar kenê û pê debara xo kenê.

	 

	Cinîyê kurdî verê ganîkerdişê kulturê kurdewar xoserîya xo ekonomî zî awan kenê. Tarîx ra heta nika cinîyê kurdî bi berardişê destan ke kenê, hem kulturê xo pawenê, hem zî xoserîya xo ekonomî awan kenê û debara xo kenê. Wan de maya Ferînaz Coban(65) bi camêrdê xo dir keye de dezgehê ke daran ra awan kerdê berardişê secadeyan kenê û bi nê berardişî debara xoo kenê.

	 

	'Ma pîya berardiş kenê'

	 

	Maya Ferînaze ard ziwan ke aye kîşte mêrdeyê xo de hêzêke û ekonomîyêke hempar vejenê meydan û wina va: "Semedo ke dewa ma amî vengkerdiş, ma dewa Hîzana Bedlîsî ra koçê Wanî kerd. Ma bî 17 serrî bi viraştişê secadeyan debara xo kenê. Mi zaf waştêne ke ez nika dewa xo de bibayne û bêrîvanî bikerdêne. Labelê ez nika tîya ya. Ez û mêrdeyê xo 17 serrî yo pîya bi eynî hêzî ma secadeyan viraznenê. Semeod ke maye û pîyê mi awankerdox bî, mi zî hêzê xo înan ra  girewt. Ma bi daran dezgehê xo awan kerd. Ez û mêrdeyê xo warê viraştişê secadeyan de serkewte bî. Ma bi kedêke hempar, ekonomîyêke hempar awan kenê. Cinî camêrdan ra hîna şîrtîqer ê. No semed ra gerek her wext kargehan de însîyatîf destê cinîyan de bo."

	 

	'Viraştişê secadeyan kedêke girs wazeno'

	 

	Maya Ferînaze ard ziwan ke her ca de girewtoxê înan estê û wina va: "Ma tewr zêde secadeyan viraznenê. Ma seba ke eşkenê her rengê ci berardiş bikerê. Ez û mêrdeyê xo her roje pîya 2 secadeyan qedênenê û roşenê. Bi rastî viraştişê înan kedêke girs wazeno. Ma bi heskerdiş karê xo kenê. Eke merdim biwazo merdim eşkeno debara xo bikero. Ez û mêrdeyê xo cîrana û kesê derûdorê xo rê benê nimûneyê xebatêke hempar. Reyan ez û mêrdeyê xo xebate dir kilaman zî vanê. Kêfê mi xebatêke hempare rê zaf yena. Verê awankerdişê nifşî hîna zêde bi."

	 

	'Cu bi xebatêke hempar hîna weş a'

	 

	Ferînaze tewr peynî da zanayîş ke ê do qetî dest viraştişê secadeyan vera nêdê û wina va: "Emrê ma derbaz beno la hîna seba cuyayîşî hewldayîşêke ma esto. Her kes eşkeno bi no hawa hem kulturê xo hem zî debara xo bikero. Cu bi xebatêke hempar weş a. Îmkanê ma yê seba awankerdişê ekonomî tewr zêde esto. Tena lazimî bi yewîya hêzî esta. Wexto ke merdim xebityeno û kede dano merdim hîna kêfweş beno. No semed ra ez qetî nêwazena fek xebate ra vera bidî."