Çalakîya Yukselî de 6 kesî ameyî tepiştiş 

2018-01-19 15:32:00


	 

	ENQERE -  Çalakîya Kuçeyê Yukselî de roja 437 de dewam kerd. Polîsan mûdaxeleyê çalakgeran kerdî û 6 kesî bi kuwayîş tepişnayî.

	 

	Çalakîya grevê vêşanî ê Nurîye Gulmen û Semîh Ozakça roja 317an û çalakîya karkerê îstîmlakkerdişî yê "Ma karê xo peyser wazenê" Kuçeyê Yukselî de roja 437an de dewam kerd. Çalakgeran waştî verê Vîrdarîyê Heqê Merdiman de îzahat bidê û êlekê bi nuşteyê "Ma karê xo peyser wazenê" dayî xo ra û Kuçeyê Konur de kom bî. Polîsê ke kuçe kerdî binê abluqa, semedê mudaxilekerdişî kutikê xo zî amade kerdî. Polîsan destûr nedayî ke çalakgerî derbazê Vîrdarîyê Heqê Merdiman bibê û îzahat bidê.

	 

	Çalakgeran senîn ke pankart akerdî, polîsan mudaxale kerd û pankart dirnayî û 6 kesan zî tepişnayî. Polîsan bi zor çalakgeran kerdî  wesayîtan û wesayît de zî çalakgeran slogan berz kerdî. Dimayê tepiştişî polîsan heta demêke rayîrê şîyayîş û ameyîşê kuçe raya pêroyî rê padayî.