Camêrdo ke hêzê xo dewlete re girewt û Rojbîne qetil kerd, hema zî nêameyo tewqîfkerdiş 

2018-01-15 13:24:52


	 

	AMED - Şehmus Îlhano ke taxa Dîcle yê qezaya Yenîşehîrê Amedî de Rojbîn Barane qetil kerdbî û badê qetilkerdişî derheqê qetlîamî de roportaj dabî rojnamegeran, hema zî teber de gêreno û nêameyo tewqîfkerdiş. Feleknas Ucaye derheqê hedîseyî de pêşnîyaza persî berde meclise û dîyar kerde ke camêrdî dewlete ra hêz genî û cinîyan qetil kenê.

	 

	24ê kanûna 2017î taxa Dîcle ya Fîskaya ke qirêdayeyê qezaya Yenîşehîrê Amedî ya de camêrdo binameyê Şehmus Îlhanî cinîya binameyê Rojbîn Barane qetil kerd û badê hedîseyî roportaj dabî rojnamegerê ke seba xebere şîbî cayê hedîseyî. Qatilê Rojbîne, Şeyhmus hema zî teber de asanî gêreno û nêameyo tewqîfkerdiş. Ame zanayiş ke qatilê Rojbîne, Şeyhmusî verê cu zî sucê edlî ver ameyo tewqîfkerdiş û 10ê teşrîna peyêne ya 2017î de bi serbestveradayişê konrolî ameyo tehlîyekerdiş. Sîyasetmedarî reaksîyon nawitî tewqîfnêkerdişê Şeyhmusî û bale antî qetilbîyayişê cinîyê ke îqtîdarîyê AKPyî de ameyî qetilkerdiş ser.

	 

	Babete ser o Parlementera HDPyî ya Amedî Feleknas Uca û Meclisê Cinîyê Sosyalîstan re Denîz Aktaşe qisey kerdî. Parlementera HDPyî ya Amedî Feleknas Ucaye dîyar kerde ke derheqê tewqîfkerdişê qatilan de pêşnîyaza persî berda meclise.

	 

	'Camêrdî dewlete ra hêz gênê'

	 

	Feleknase qiseykerdişê xo de wina va: “Camêrdî dewlete ra hêz genî û cinîyan qetil kenê. Demê peyênan de hêrişê vera cinîyan zêde bîyî û keso binameyê Şehmusî kamerayan ver de bi asanî îfade kerd ke Rojbîne aye bi xo qetil kerdo. No kes taxe de yeno şinasnayiş, asanî gêreno û nîno tewqîfkerdiş. Na rewşe merdiman keno şikî.”

	 

	Feleknase qiseykerdişê xo yê verênan de qala qetilbîyayişê Rojbîne kerde û wina va: “No şexsîyet qetilkerdişê Rojbîne re dima agêreno taxe. No kes beno ke sewbîna kesan zî qetil bikero. Şehmusî rojnamegeran re vato qatilê Rojbîne ez bi xo ya û rojnamegeran tehdit kerdo. Tîya de no netîce vejîyeno raşte ke camêrdî dewlete ra hêz genî û cinîyan qetil kenê.”

	 

	'Asayîşê ganê cinîyan çin o'

	 

	Meclisê Cinîyê Sosyalîstan re Denîz Aktaşe zî qiseykerdişê xo de wina va: “Wextê îqtîdarîyê AKPyî de qetilkerdişê cinîyan zêde bîyo û na rewşe polîtîkayê dewlete ya. Polîtîkayê AKPyî girêdayeyê dişmenîya vera cinîyan î. Hêzo ke bieşko na rewşe teşhîr bikero, hêzê cinîyan o. Qatil bi asanî teber de gêreno. Na rewşe nîna qebulkerdiş. Qatil teber de gêrenê û ewleyîya cinîyan çin a. Wa no kes bêro tewqîfkerdiş.”