Karkera camî Burçake: Ma êdî her ca de yê 

2018-01-14 12:57:10


	 

	Habîbe Eren\Duygu Erol

	 

	ENQERE - Burçak Tekîna ke Xanê Pîlavoglu de dikanê xo de karkerîya camî kena û semedo ke karê camî sey karê camêrdan yeno vînayîş, reaksîyon mojna ra. Burçake dîyar kerde ke cinî êdî her ca de estê.

	 

	Xanê Pîlavoglu yê tarîxî ke qezaya Altindagê Enqere de yo seserra 17ine ra heta nika bîyayîşê xo paweno. Xan bi dêsanê xo yê kerpîç û text bale anceno. Semedê cinîyê ke berardiş kenê zî cayêke girîng gêno. Her dikan de berardişê cîya yenê kerdiş û cinî mîyanê piştdayîş de xebityenê. Yew ê dikanan ra Burçak Tekîne yo. Arkeolog Burçak Tekîne dimayê ke teqawît bena dima dikan akerd û karê camî kena. Burçake bi 7 serrî yo karkerîya camî kena.

	 

	'Vatî 'ti do senîn bikerê'

	 

	Têkewtişê dikanî de tabloyê 'ma berardiş kenê, ma estê' ca gêno û no zî esasê xo de vindertişê cinîyan mojneno ra. Burçake dîyar kena ke karkerîya camî karêke xeylê bi kêf o va akerdişê dikanî de xeylê kesî hemver vejyîyayê û wina va: "Semedê problemê ekonomî, xeylê kes nêeşkenê çîyêk bikerê. Wexto ke mi newe dest pêkerd, hemine va ti do senîn bikerê. Tirkîya de her wext winî bi û netîce de wexto ke pêserîyê cinîyan bibo eşkenê bibê wayîrê karî."

	 

	'Ma yewbînan sey raqîb nêvînenê'

	 

	Burçake da zanayîş ke êdî êdî berardişê keda destê merdiman zî bena wayîrê erjî û qiseykerdişê xo wina dewam kerde: "Turîstê mintiqa û xerîbî taybetî serdayîşê nê dikanan kenê. Ma cinîyê xanî dir piştdayîş de yê. Ma embazan taybetî sey raqîb nêvînenê. Xeylê çî estê ke ma pîya pare bikerê. Ez cam viraznena embazêke bîn textan. Ma zaf çî yewbînan ra musenê."

	 

	'Eke ez keye de biniştêne ro mi nêeşkayne winî bikerdêne'

	 

	Burçake wexto ke cam viraznena, xeylê xemlan zî camî dir xebitnena û cam û sîm ana têver. Burçake qiseykerdişê xo winî qedêna: "Karêke zehmet û sebir wazeno. Wexto ke ma cam viraznenê, semedo ke nêqelişîyo ma zaf bi baldarî kenê. Karê ma sey karê camêrdan yeno nasnayîş. La ma her ca de yê. Ez veng dana cinîyan. Çîyêke nêeşkê bikerê çin o. Wa keye de nênişnê ro û cayê winî de dikan akerê û berardişê destê xo biercnê. Wa cinî na babete de xo peyser nêancê."