Încî hemverê qedexeyê ziwanê kurdî şîîranê xo kurdî viraznena 

2018-01-12 12:45:00


	 

	Rojda Aydin

	 

	AMED - Cinîya bi nameyê Încî Egîda ke şîîranê xo bi ziwanê kurmancî nusnena, va ke ziwano ma yo kurmancî binê zor û tedayan de yo û ameyo qedexekerdiş.  Wa dayîkî bi ziwanê xo domanan dir qisey bikerê. Wa domanî verê heme çî ziwanê dayîke bimusê.

	 

	Şaîra cinî a bi nameyê Încî Egîda ke qezaya Milazgîrê Mûşî de ameya dinya, mektebe nêwenda û perwerdeyêke taybetî nêdîya. Încîya ke dimayê musayîşê wendiş û nuştişî bîya, ciwanîya xo de dest bi nuştişê tewir bi tewir kerda. Încî 16 serre ya xo de ser domanêke şiwanî de kitabêke nuşto. Vîst serrî ya xo de zî ser ê koç kerdişê Kurdistanî ver bi metrepolan ra kitabêke nuşto. La semeod ke îmkanan nêeşkaya kitabê xo çap bikero. Serra 1990an de wexto ke Rojnameyê Azadîya Welat vejêno aye binê şert û mercê giran de muxabirî kena. Xeylê xeber, şîîre û cigêrayaşî aye Azadîya Welat, Gundem û ê bînan de ameyê weşanayîş. O wext de aye kitabêke şîîran a bi nameyê  ‘Evîna Mezin’ wazena vejo. La wexto ke eşrawena çap, çap de vinî beno. Heta nika zî xebatê xo yê nuştî dewam kena.Taybetî  şîîran nusnena. Kitabê Încî bi nameyê ‘TU’ aşma Temmuza 2014an de çapxaneyê J&J ra ameyo çapkerdiş. Încî ard ziwan ke binê zor û tedayan de ya û ameyo qedexekerdiş.

	 

	Încîya ke xêrcê nuştişê şîîran ti karêke bîn nêkena û wina va: "Mi heta nika tena kitabêke kurdî veto û o zî ‘TU’ yo. Labelê xêrcê no kitabê mi, mi zaf şîîrî nuştê. La mi çap nêkerdê. Mi şîîrê xo ser cuyayîş û hedîseyan nuştê."

	 

	'Şîîre rihê merdiman a' 

	 

	Încî ard ziwan ke şîîranê xo xeylê ser hedîseyan de nuştê û wina va: "Şîîrê mi ser hedîseyê ke qewimyayê de yê. Nimune; wexto ke cengawerêke cuya xo vinî kerda/o, ya zî cinîyêke bi tedayan dir rî bi rî menda û sewbînî nuştê."

	 

	'Amancê mi o yo ke her karê edebîyatî dewam bikerê'

	 

	Încî peynîye qiseykerdişê xo de va ke nika şîîranê kurdî nusnena û wina va: "Ziwanê ma yo kurdî binê zor û tedayan de yo û ameyo qedexekerdiş. Labelê cuya ma de şîîr û roman mendê. Gerek ma wayîr înan rê vejîyê. Amancê mi o yo ke her karê edebîyatî dewam bikerê. Heta ke ez bieşkî bifikrîyî ez do binusnî. Wexto ke mi nuşt ez do biweşnî. Semedo ke ciwanê ma ziwanê xo biwanê. Wa dayîkî bi ziwanê xo bi domananê xo dir qisey bikerê. Wa domanî vera heme çî ziwanê dayîke bimusê."