Cinîyê Semsûrî: No zî polîtîkayêke dewlete yo 

2018-01-11 13:02:13


	 

	SEMSÛR - Semedê qedexekerdişê tûtinî nêrazîbîyayîşê şarê Semsûrî girs beno. Cinîyê Semsûrî ardî ziwan ke Semsûr de tutin ameyne ramitiş û cinî erdan de tutin ramitêne û pê debara xo kerdêne. Cinîyê ke reaksîyon hemverê nê caardişan dayî wina vatî: "Dimayê ke ramitişê tutinî ame qedexekerdiş, ma êdî se bikerê û ma debara xo senîn bikerê?"

	 

	Cinîyê qezaya Bulamê yê Semsûrî ke ardê tutinî de xebityenê û debara xo kerdêne dimayê ke ramitişê tutinî ame qedexekerdiş, reaksîyon mojnayî ra û wina vatî: "Semedo ke Semsûr de en zêde tutin yeno ramitiş, tena îmkanê ma yê ke ma erdê tutinî de bixebityê estbi. La dimayê ke ramitişê tutinî ame qedexekerdiş şarê tîya û cinî do se bikerê û roje ra nat debare xo senîn bikerê?"

	 

	Cinîyê Bulamî ra bi nameyê Elîf Korkmaza (56) ke maya 8 domanan a va ke 4 serre yo karê tutinî de xebityena û wina va: "Semedê Walîyê Semsûrî ramitişê tutinî qedexe kerdo ma nêzanê ke a roje ra nat senîn debara xo bikerê. Semedo ke cinîyê tîya erdê tutinî de xebityenê, hem ewnîyenê domananê xo ra û hem zî debara keyeyê xo pê kerdêne û mihtacî ti kesî nêbîne. Bi taybetî zî kesê ke feqîrê no karî kerdêne. Ma do na aşma zimistanî de se bikerê û senîn bikerê?"

	 

	'Cinî karê tutinî de xebityenê'

	 

	Hemşaredara Şaredarîya qezaya Bulamî Cemîle Buyukşahîne zî ard ziwan ke cinî hem keye de û hem zî tebera xebityenê la kede înan nîna vînayîş û dewamê qiseykerdişê xo de wina va: "Cinîyê tîya semedo ke mihtacê ti kesî nêbê bi tena serey xo têkoşînê cuyayîşî danê. No semed ra zî, cinî xeylê waran de xebatan kena. Ê waran ra yew zî semedo ke tewr zaf tutin o, Semsûr de yeno ramitiş cinî zî karê tutinî kenê û erdê tutinî de xebityenê."

	 

	'No zî polîtîkayêke dewlete yo'

	 

	Cemîle peynîye qiseykerdişê xo de va ke amancê hukmetî o yo ke bi temamê mintiqa feqîr verdo û qiseykerdişê xo wina qedêna, "No zî polîtîkayêke dewlete yo. No semed ra wazenê mintiqa veng bikerê. Tîya taybetî babeta ma de, tena tutin esto. Semedo ke na mintiqa de en zêde tutin eşkeno bêro ramitiş. No semed ra gerek ma heme hemverê qedexekerdişî vejîyê. Eke ma hemver nêvejîyê, ma do ca û warê xo ra bibê."