Hemverê caardişê 'cilê yew tîpî' warê têkoşînî yenê awankerdiş 

2018-01-09 14:58:46


	 

	Zulal Koçer

	 

	STENBOL - Platformê hemverê caardişê ‘cilê yew tîpî' 16ê Çele de do çapemenî rê bêro deklerekerdiş. Platform de huqûqnas û rêxistinê heqê merdiman zî estê. Derheqê platformî de Gulseren Yolerî wina va: “Amancê ma yê sereyîn, no caardiş wirzo. La hemverê problemê ke vejyê meydan, ma plan kenê ke ekîbê bi hepisxanan dir eleqedar bibê awan bikerê."

	 

	Reaksîyonê hemverê caardişê ‘cilê yew tîpî' dewam kenê. Wexto ke caardiş ame rojeve ra dima avûkatê heqê merdiman û îzahatê hempar dayî. 16ê Çele de do platformêke înan ra ameyo meydan bêro awankerdiş. Sereka ÎHDî yê Stenbolî Gulseren Yolerî derheqê platform û xebatê ke dewam bikerê qisey kerde.

	 

	Gulserene da zanayîş ke lazimîyê platformê wina ard ziwan ke: "No caardiş bi amancê Îşkence û heyfgirewtişê serekkomarî yo. No bi vatişê xo îfade kerd. Reyna no îzahat hepisxaneyê Guantanamo referans girewt. Senîn ma no eşnawit ma tersay. Semedo ke no caardiş mabêne serrê 1983-84an de amebi kerdiş û bi îşkenceyê giran netîce bibi."

	 

	Gulserene dewam de ard ziwan ke o wext netîceyê têkoşînê hepsîyan de dest caardişî ameyo veradayîş û wina va: "La wextê ke zehmet bi. Bi sebebê xeylê ganan. Heto bîn ra dima ra no caardiş dem bi dem ame rojeve.  Serra 1987an de ame rojeve û dima ra 2003an de hetê AKPî ra ame rojeve."

	 

	Gulserene qiseykerdişê xo wina dewam kerde: "Her ke no caardiş ame rojeve, semedê reaksîyonan ame wedartiş. Serekê Pêroyîyê AKPî Tayyîp Erdogan aşma Temmuze de îzahat da û dima ra ma kewtî tevger û ma kombîyayîşêke ca ard. Dima ra platformêke ame awankerdiş, la xo deklere nêkerd. Rêxistinê teberê ma bawer nêkerdêne no caardiş bibo qanûn."

	 

	'Do tecrîd giran bo' 

	 

	Gulserene dîyar kerde ke sey ÎHDî endîşeyê xo de heqdar bîyê û wina va: "No caardiş do bandure hukmkerdiş bikero. Do bandure heqê xorêsnayîşê weşî û dermankerdiş bikero. Reyna do bandure ser pêvînayîşan bikero. Yanî do tecrîd giran bibo. Bi no caardişî wazenê heme komelî bikerê yew tîp."

	 

	Hemverê halê lezgîn do ekîbêke bêro awankerdiş

	 

	Gulserene peynîya qiseykerdişê xo de da zanayîş ke bi rêxistinê heqê merdiman û huqûqî de platformêke awan kerdê û va wexto ke biko dewre problemna rê lezgînî çareser bivînê û wina va: "Ma plane kenê ke semedê her hepisxaneyî ekîbêke awan bikerê. Reyna do nê probleman bi raya pêroyî dir pare bikerê. Do rapor bêrê amadekerdiş. Amancê ma o yo ke caardiş bêro wedartiş. 16ê Çele de ma do bi kombîyayîşêke deklere bikerê.”