'Viraştişê HESan qetilkerdişê xoza yo' 

2018-01-06 11:34:12


	 

	Zeynep Turgut

	 

	ERDEXAN - Her hetê Tirkîya de viraştişê awbend û Santralê Hîdro Elektrîkan (HES) dîyayî dest pêkerdiş. 3 qezayê Erdexanî Posof, Hanak û Çildirî de zî xebatê HESan estî û dest pêkerdişê xebatan re nata çem û robarî her ke şono zuwa benê. Hukmat bi viraştişê awbend û HESan hemsencîya tebîetî xira keno û xoza binê awbendan de yeno qetilkerdiş. Rojhelato Mîyanên de Kurdistan bi xoza û tebîetê xo yê weşîk yeno naskerdiş. Labelê tebîet hetê hukmatî re ameyo hedefgirewtiş û tarîx bi dînamîtan yeno rijnayiş.

	 

	Wendekarê unîversîteye reaksîyon nawitî viraştişê HESan û dîyar kerdî ke ganî seba cuyêka weşe destûr nîdîya qetilkerdişê tebîetî. Babete ser o wendekaran re Rojda Gûl û Feyza Nur Demîre qisey kerdî.  Merkezê bajar û 3 qezayan de dest pêkerdişê awbendan re nata roj bir oje herikîyayişê awe kêmî bîya.

	 

	'HESan rê bêveng nêmanê'

	 

	Rojda destpêkê qiseykerdişê xo de va ‘tebîet bi destûrê desthilatdaran yeno qetilkerdiş’ û wina dewam kerde: “Ganî kesêk daxî vera nê viraştişê awbend, HES û qetlîamê tebîetî de bêveng nêmano. Eke hedef berardişê cereyanîyo se raybazê tebîî estî û sewbîna raybazî bêrî xebitnayiş. Qetilkerdişê tebîîetî reyde qetilkerdişê merdimî zî yeno qebulkerdiş. 4 serrî ya ke ez tîya de cuyena. Dest pêkerdişê HESan re nata mergê heywanan zêde bîyî. Ez Xelfetîyê Riha re ya û ewja de zî viraştişê awbendan dîyayî dest pêkerdiş. Dinya bê tebîîetî nêbeno.”

	 

	'Cuya merdim, heywan û daran tehluke de ya'

	 

	Feyza qiseykerdişê xo de bale ante viraştişê HES û awbendan ser û wina va: “Viraştişê HES û awbendan de hedef qetilkerdişê merdiman o. Tebîîetê Erdexanî zaf weş o. Cuya merdim, heywan û daran tehluke de ya. Hemsencê tebîîetî bi viraştişê HESan xira bena. Finak rewşa Hopa raşte de ya. Viraştoxê HESan erj nêdanî cuya merdiman, seba înan tena HESî muhîm î. Ganî heme kesî reaksîyon binawnî HESan û qebul nêkerî.”