Sîcîlê doktora ke peymeyo zêde derman dabî domananê kurdan xirab vejîya 

2018-01-05 12:23:53


	 

	Evrîm Kepenek

	 

	STENBOL - Derheqê Dr. Burcu Gursoya ke peymeyo zêde derman dabî domananê kurdan û bîbî sebebê xisarê daîmî çîyê newe vejîyayî raşte û ame zanayiş ke Burcu vera kedkarê ke 1ê Gulana 2015î de ameybî tepiştiş de kerdişê bêusulî kerda û seba ke ‘karê xo xirab xebitnaya’  derheqê aye de 38. Mehkemaya Cezaya Girde ya Stenbolî de doze amey akerdişe.

	 

	Xebera manşetê rojnameyê Yurtî yê 3ê gulana 2016î de vejîya bî raşte ke Dr. Burcu Gursoye ke Nêweşxaneyê Dewlete yê Kagithaneyê Stenbolî de xebitîyayêne dermanê peymeyo zêde daya domananê kurdan û 38. Mehkemaya Cezaya Girde ya Stenbolî de ameya muhakemekerdiş. Hedîseyo ke bîyo muhakemekerdişê Burcu 1ê gulana 2015î de ameyo cuyayiş.

	 

	Parlementerê HDPyî yê aye wextî Salîh Şahînî Beşîktaş de pîrozkerdişê çalakîyê 1ê gulane de tewrê komêk embazê xo hetê polîsan re ameybî tewqîfkerdiş. Badê tewqîfkerdişî Salîh û embazê xo erşawîyayî Nêweşxaneyê Dewlete yê Kagithane yî û wesayît de ameyî vindetiş. Burcu ewja de weyşaya wesayîtê polîsan û qerta doktorî pira çin bîye. Wesayît de Salih vano qerta dortorê qey Burcu de çin a û dima re babete ser o munaqaşe vejîyenê. Burcu herinda ke muayenexane de înan kontrol bikera wesayît de kontrol kena û dima re raporêko bêusulî amade kena. Salîh 8ê gulana 2015î de muracatê mehkema keno û Burcu ra gerrekar beno.

	 

	Avûkata Salîhî, Gulîzar Tuncere semedê destûrê hukmkerdişê Burcu bêro dayîş muracatê Qeymeqamtîyê Kagithane da. Muracatê Gulîzare 5ê Tebaxa 2015an de ame qebulkerdiş. 38in Dadgeha Cezaya Asliyeyê Stenbolî derheqê Burcu de bi sûcdarkerdişê ‘wezîfeyê xo xerab bi kar ardo' qerar da ke dewa bêro akerdiş. Burcu roniştişê 2. yê mehkema de sucdarkerdişan qebul nêkerde û xo pawite. Tewr peynî 19ê kanûne de mehkemaya Burcu ameybî dîyiş û taloqê tarîxêko bîn amey kerdişe.