Sîyê goran ameyî tepiştiş! 

2018-01-04 13:55:18


	 

	AMED - Bi fermanê Serdozgerîya Komara Amedî dimayê sîyê goranê ê Amedî şiknayî, en peynî qezaya Bismilî de zî polîsan sîyê goran şiknayî.

	 

	Qezaya Bismilî yê Amed de, Mudirîyê Polîsan bi fermanê Serdozgerîya Komara Amedî sîyê goran ke nameyê PKKîyan ser înan de amebi nuştiş, ê endamê HPG, YPG, YPJ, YPS, YPS-JIN û YJA-STARî şiknayî. Nameyê şerwanan vurnayî û cayê înan de sîyê newe dayî ro. Polîsan saetê şanî de goristan kerdî binê abluqa. Sîyê ke serê înan de şehîd, şahadet, tarîx û nameyê kod estbî, yew bi yew şiknayî û vera înan tena nameyê înan ameyî nuştiş. Polîsan wexto ke sîyê goran vurnayî, gor heme şiknayî û sîyê goran derûdor de vila kerdî. Hîn nuşteyê ser goran zî bi boyaxê sîya ameyî sîyakerdiş.

	 

	'Bi esteyê ma dir şer kenê'

	 

	Goreyê şahidê hedîse, polîsî bi saetan goristan de vindertê û heta saet 23.00 goristan de mendê û her ca kerdê têmyan. Goristano ke gorê Fermandarê HPGî Ertem Karabulut zî tede yo, polîsan şîşê dorê gorê Ertemî şiknayî û kewtî zere. Sîyê gorî zî tede, sîyê binê lingê Ertemî ke vatişê ey zî ser debi, cayê înan ra wedarnayî û berdî emniyet. Keyeyê Ertem Karabulutî reaksîyon hemverê hêrişê polîsan dayî û vatî ke, "Bi esteyê ma dir zî şer kenê." Ertem Karabulut (Numan Amed) 31ê Kanûna 2012an de hêrişêke hewa de cuya xo vinî kerdib.

	 

	No hêrişê yewin nîyo 

	 

	Demê vîyarte de bi fermanê Serdozgerîya Komara Amedî, polîsan xeylê sîyê goran ê Goristanê Yenîkoyî yê Amedî zî şiknayî, keyeyan reaksîyon hemverê hêrişê polîsan dabî û reyke bîn sîyê gorê domananê viraştibî.