Keyeyê hepsîyan vera kincê yew tîpî de vengê têkoşînî dayî

2018-01-03 11:48:21


	 

	Şehrîban Aslan

	 

	AMED- Reaksîyonê kincê yew tîpî ke hukmatê AKPyî hepsîyan ser de ferz keno, zêde benê. Keyeyêk hepsîyêk Feryaz Akşahîne dîyar kerde ke ganî heme keyeyê hepsîyan pîya têbigeyrî û reaksîyon binawnî nê kerdişan. Feryaze qiseykerdişê xo de qerarê hepsîyan ‘ma do kincanê yew tîpî bidirînî ‘ arde vîr û wina va: “Lajê mi va; ma do kincan xora nêdî û têkoşîn bidî. Eke hepsî xever bidî, ma do zî teber de xoverdayiş bidî dest pêkerdiş. Domanê ma bêsuc zindanan de yî. Dewlete hepsîyan ser de kincanê yew tîpî dana ferzkerdiş û do netîceyê nêbaş bivejîyî raşte. Dewlete nê netîceyan re berpirsîyar a.”

	 

	Îşkence dewam keno

	 

	Feryaze dewamê qiseykerdişê xo de va ‘ferzkerdişê xoradayişê kincê yew tîpî îşkence yo’ û wina dewam kerde: “Bi hezaran ciwanê ma bêsuc û keyfî zindanan de yenê tepiştiş. Birayê mi 9 aşmî ver keye de ame tepiştiş û erşawîya zindanê Elezîzî. Parsuyê birayê mi bi îşkence ameyî şiknayiş û her tewir îşkence bi birayê mi kerdî. birayê mi berdî gola Hezarî û ewja de birayê mi kerdî awa cemednaye. Mi birayê xo pêvînayiş de nêşinasna û nêberdî nêweşxane. Ganî heme kes veng bido. Ma do vengê domananê xo bidî eşnawitiş.”

	 

	Feryaze tewr peyên wina va: “Hukmat wazeno ke bi ferzkerdişê kincê yew tîpî kurd û hetê demokratîkan çin bikero û înan teslîm bigîro. Kurd ti reye nêqedîyenê. Yewê kurdan beno 20. Nika hêrişê gorê kurdan kenê û înan re tersenê. Kam cu wijdan de no esto û qebul keno. Ma destûr nêdanî xoradayişê kincê yew tîpî. Ma hertim piştîya domananê xo de yî.”